Horfur eru á gulleitri slikju og svifryksmengun yfir höfuðborgarsvæðinu um helgina vegna bílaumferðar, að sögn Einars Sveinbjörnssonar veðurfræðings. Ástæðan er yfirvofandi hægviðri.
Nú þegar mælist vaxandi mengun á Grensásvegi. Gulleiti liturinn tengist köfnunarefnistvíildi, sem kemur með útblæstri jarðefnaeldsneytisbifreiða.
Aðstæður fyrir loftmengun eru fullkomnar nú þegar loft er þurrt, rakastig aðeins um 50% til 60% og vind hreyfir lítið.
„Nú eru hins vegar allar líkur á því að vindur verði hægur, austan andvari eða allt að því logn. Nú síðdegis á fimmtudegi er hann reyndar þegar orðinn hægur,“ segir Einar á Facebook-síðu sinni og bendir á að loftmengun mælist nú þegar vaxandi.
„Um leið og dregur úr loftblöndun kemur aukinn styrkur fram á mæli fyrir svifyk á mælistöðinni við Grensásveg. Að auki kólnar heldur og frystir. Þá myndast hitahvarf við jörðu - það er annar þáttur sem dregur úr loftblöndun.“
Jólaösin verður einn drifkraftur mengunarinnar. „Í umferðinni sem líklega verður umtalsverð frá morgni til kvölds næstu daga og einnig í ösinni um helgina, má alveg reikna með að svifryksmengun verði í hærri kantinum. Ekki síður kofnunarefnistvíildi, en sú lofttegund myndar gulleitu slikjuna saman með svifrykinu.“
Í aðstæðum sem þessum er gjarnan gefin út viðvörun til leikskólabarna og fólks með viðkvæm öndunarfæri, sem og almennings alls um að forðast heilsurækt utandyra, sérstaklega nærri umferðaræðum.
Einar býst við því að ástandið vari fram á mánudag eða þriðjudag, þegar fer að blása að nýju og raki berst úr suðvestri.
Í haust hefur mátt rekja svifryksmengun til fokefna af hálendinu. Svifryksmengunin hefur því verið af náttúrulegum orsökum. Annað er uppi á teningnum núna. „Svifrykið nú um helgina verður hins vegar alfarið frá umferðinni og vitanlega einnig NO2 lofttegundin sem verður til við bruna eldsneytis. Ekki síður er vert að fylgjast með mælingum á henni.“
(e. nitrogen oxides)
https://malid.is/leit/K%C3%B6fnunarefnisox%C3%AD%C3%B0