Kristján Loftsson, framkvæmdastjóri Hvals Hf., segir reglugerð sem setur eldsneytisnotkun innan íslenskrar landhelgi skorður vera mikið bruðl. Umrædd reglugerð, sem tók gildi 1. janúar 2020 kveður á um að leyfilegt brennisteinsinnihald í skipaeldsneyti í íslenskri landhelgi megi ekki vera hærra en 0.1 prósent. Leyfilegt innihald var áður 3,5 prósent.
Samkvæmt útreikningum Kristjáns kostar þessi reglugerð skipaflota landsins fimm til sex milljarð króna á ári. Þessi útgjöld mætti spara ef íslensk stjórnvöld myndu breyta reglugerðinni og gefa leyfi fyrir notkun á eldsneyti með 0,5 prósent brennisteinsinnihaldi, eins og reglur IMO (International Maritime Organisation) kveða á um.
Ummæli Kristjáns féllu á fundi sem haldin var á vegum Samtaka fyrirtækja í sjávarútvegi (SFS), í Hörpu þann 10. nóvember síðastliðinn. Um var að ræða síðasta viðburðinn í fundarröð sem SFS stóð að og átti viðkomustaði víða um land. Yfirskrift fundarraðarinnar var „hvað hefur sjávarútvegurinn gert fyrir þig.“ Upptaka af fundinum birtist fyrir skömmu á Youtube-rás SFS.
Fundarstjóri var Gísli Freyr Valdórsson, fréttastjóri viðskiptadeildar Morgunblaðsins. Ræðumenn voru Heiðrún Lind Marteinsdóttir, framkvæmdastjóri SFS, Konráð S. Guðjónsson, þá starfandi sem aðalhagfræðingur Arion banka sem sinnir nú starfi aðstoðarmanns fjármála- og efnahagsráðherra, og Björn Berg Gunnarsson, fjármálaráðgjafi.
„Þetta kostar stjórnvöld ekki neitt, það þarf bara að breyta 100 orðum í reglugerð.“
Farið var um víðan völl í ræðunum sem haldnar voru á fundinum, en í lokalið fundarins var opnað fyrir spurningar úr sal. Þar voru ræðumenn spurðir út í mörg ólík mál, allt frá ábyrgð sjávarútvegsins í byggðaþróunarmálum, útflutning á óunnum fiski og erfiðum kjaraviðræðum SFS við VM, félag vélstjóra og málmtæknimanna
Innlegg Kristjáns Loftssonar var sett fram undir þeim og upp úr þeim sköpuðust umræðurnar í kringum athugasemd hans. Í þeim má til að mynda heyra áheyrendur í sal velta fyrir sér hvort sparnaðurinn sem hlytist af því að breyta núverandi reglugerð mætti nota til að greiða úr kjaradeilunni á milli SFS og Félags vélstjóra og málmtæknimanna (VM), sem uppskar hlátur viðstaddra. Sömuleiðis má heyra Kristján Loftsson kalla: „Þetta kostar stjórnvöld ekki neitt, það þarf bara að breyta 100 orðum í reglugerð. Þeir eru búnir að kvitta upp á alltof mikið í þessu loftslags kjaftæði. Þetta er það sem er að keyra útgerðina í svaðið að mínu eigin mati.“
Frumvarp Svandísar væntanlegt
Fundurinn var lokahnykkurinn í hringferð sem SFS fór um landið undir yfirskriftinni „Hvað hefur sjávarútvegurinn gert fyrir þig?“ Fundaherferðin var vel auglýst, meðal annars í sjónvarpi, og alls héldu samtökin opna fundi á Ísafirði, Akureyri, Egilsstöðum, í Ólafsvík, Grindavík og Vestmannaeyjum áður en hringnum var lokað í Reykjavík 10. nóvember.
Tímasetning fundaraðar SFS vakti athygli í ljósi þess að Svandís Svavarsdóttir matvælaráðherra hafði boðað að frumvarp hennar um stórfelldar breytingar á lögum um sjávarútveg yrði lagt fram í drögum í samráðsgátt stjórnvalda fyrir árslok.
Drögin voru birt fyrir tæpri viku en samkvæmt þeim stendur meðal annars til að gera breytingu á innheimtu veiðigjalda, á því hvernig tengdir aðilar í sjávarútvegi eru skilgreindir og á þeim kvóta sem útgerðablokkir megi halda á séu þær skráðar á markað.
Ísland hefur sett ströngustu reglur um cadmíum í áburði meðan ESB hefur eftir áratuga rannsóknir komist að því að ekki sé þörf á reglum um cadmíum. Kostar bændur margar milljónir árlega.
Vegagerð til Vestfjarða um Teigsskóg tafðist í áratugi vegna kröfu um umhverfismat. Samkvæmt ESB reglum hefði sú vegagerð ekki þurft í umhverfismat þar sem vegurinn er ekki 2+2 eða hraðbraut. Sér íslenskar reglur krefjast þess að allir vegir yfir 10 km fari í umhverfismat.
Á hann engin börn og barnabörn sem honum þýkir vænt um? Hann sjálfur getur þó - eins og þróunin er og almennar lífslíkurnar - fengið einnig að sjá sitt hvað af veðurvánni áður en hann fer yfir móðuna.