Orkustofnun hefur, ásamt orku- og veitufyrirtækjunum á Reykjanesi, unnið að því að meta búnað sem til er í landinu sem þyrfti til að viðhalda hitaveitunni á Reykjanesi komi til goss á Reykjanesi. „Ríkir almannahagsmunir eru í húfi og ljóst að ef dekkstu sviðsmyndir raungerast þyrfti viðbótarbúnaður að vera tiltækur hér á landi,“ segir í tilkynningu á vef Orkustofnunar. Núna er ekki tiltækur nægilegur búnaður í landinu til að tryggja hitaveitu á Reykjanesskaga ef Svartsengi yrði fyrir skakkaföllum vegna jarðhræringa.
Orkustofnun segir nú unnið að greiningu og athugun á því hvernig nálgast megi slíkan búnað og meta kostnað af aðgerðum.
Upplýsingum frá Orkustofnun, HS Orku og HS Veitum hefur þegar verið miðlað til fulltrúa ríkisstjórnarinnar „enda ríkir almannahagsmunir í húfi,“ segir í tilkynningu Orkustofnunar. Halla Hrund Logadóttir orkumálastjóri segir að ríkið þurfi að taka afstöðu til kaups og/eða leigu á búnaði sem tengjast rekstri hitaveitu á svæðinu eins skjótt og auðið er. Slík fjárfesting myndi nýtast áfram til að tryggja orkuöryggi byggða landsins þegar upp koma bilanir eða aðrar krefjandi aðstæður og gæti mögulega stutt við orkuskiptin sé tækni sem gefur færi á því valin. Þó sé líklegt að til að kynda þær í fyrstu þyrfti að notast við jarðefnaeldsneyti og því þurfi einnig að tryggja birgðarstöðu þess hér á landi.
Orkustofnun hefur sett sig í samband við systurstofnanir á Norðurlöndum og beðið um að farið sé yfir möguleika á því að búnaður sé sendur til Íslands.
Ef virkjunar eigandi hefur virkjað sér til framdráttar, þá ætti hann og að vita hver áhættan er!
Það að gera kröfu til samfélagsins er hagnaður virðist í hættu, er til skammar.
Er ekki þetta fyrirtæki í erlendri eigu?