Barist við „stjórnlausa“ gróðurelda á Tenerife

Gróð­ur­eldar sem nú geisa á Tenerife í Kanarí-eyja­kla­s­anum eru enn sem komið er fyrst og fremst bundnir við frið­uðu fjall­lendi í nágrenni eld­fjalls­ins Teide. Um 250 slökkvi­liðs­menn berj­ast við eldana en hafa ekki náð að hemja útbreiðslu þeirra svo nokkru nemi. Að minnsta kosti 1.800 hekt­arar lands hafa brunnið á aðeins einum sól­ar­hring.

Eldarnir kvikn­uðu í gær í fjall­lendi svæða sem kall­ast Arafo og Candelaria á miðri Tenerife. Þurft hefur að rýma fimm þorp þar í grennd og vegum að þjóð­garð­inum sem eld­arnir loga í verið lokað.  

Yfirvöld telja hættu á að eld­arnir breið­ist út til dval­ar­staða ferða­manna þar sem þeir gætu borist á milli furutrjáa, sem eru mjög eld­fim eftir þurrka. Ef ekki tekst að hefta útbreiðsl­una gætu eld­arnir náð til ferða­manna­staða á borð við Santa Cruz de Tenerife og Puerto de la Cruz.

„Eldarnir eru öfl­ugir og eru á svæði sem er erfitt að athafna sig á,“ sagði svæð­is­stjóri Kanarí-eyja, Fernando Clavijo, á blaða­manna­fundi. „Eldarnir á Tenerife eru stjórn­lausir og útlitið er ekki beint bjart.“

Tveir alþjóða­flug­vellir eru á Tenerife. Þeir starfa enn sam­kvæmt venju.

Hita­bylgja gekk yfir Kanarí-eyjar í síð­ustu viku. Henni fylgdu miklir þurrkar svo elds­matur er mik­ill. Gróð­ur­eldar kvikn­uðu á eyj­unum Gran Canaria og La Palma fyrr í sumar við sömu aðstæður.