Finnur, Ari og Guðrún sett út úr stjórn Íslandsbanka

Finnur Árnason, stjórn­ar­for­maður Íslands­banka, er ekki meðal þeirra sem til­nefndir eru í stjórn bank­ans fyrir hlut­hafa­fund sem hald­inn verður 28. júlí. Hið sama er að segja um Guðrúnu Þor­geirs­dóttur, vara­for­mann stjórn­ar­innar, og Ara Dan­í­els­son stjórn­ar­mann.

Sjö manns sitja í stjórn Íslands­banka og til­nefnir Banka­sýsla rík­is­ins þrjá þeirra, auk eins vara­manns, en til­nefn­ing­ar­nefnd Íslands­banka til­nefnir fjóra, auk eins vara­manns. Stjórn Banka­sýsl­unnar til­nefnir þau Önnu Þórð­ar­dóttur og Agnar Tómas Möller, sem bæði sitja í núver­andi stjórn, auk Hauks Arnars Birg­is­sonar. Haukur Örn er lög­fræð­ingur og fyrr­ver­andi sam­starfs­maður Agnars, en Haukur Örn sat í stjórn Gamma á árunum 2009 til 2012. Agnar er annar af stofn­endum Gamma og starf­aði þar á sama tíma sem sjóðs­stjóri og fram­kvæmda­stjóri sjóða.

Til­nefn­ing­ar­nefnd Íslands­banka til­nefnir í stjórn­ina þau Frosta Ólafsson og Valgerði Skúla­dóttur, sem bæði sitja í núver­andi stjórn. Auk þess eru til­nefnd þau Linda Jóns­dóttir og Stefán Pét­urs­son sem koma ný inn. Linda er fram­kvæmda­stjóri rekstrar hjá Marel en hefur áður starfað fyrir Eimskip, Burðarás og Straum fjár­fest­inga­banka. Þá hefur hún setið í stjórn Við­skipta­ráðs og Fram­taks­sjóðs Íslands. Til­nefn­ing­ar­nefnd hefur lagt til að Linda verði kjörin for­maður stjórn­ar­innar.

Stefán er fjár­mála­stjóri lyfja­þró­un­ar­fyr­ir­tæk­is­ins EpiEndo Pharmaceuticals ehf. en var áður fjár­mála­stjóri Arion banka í ára­tug. Hann var stjórna­for­maður AFLs spari­sjóðs og sat í stjórn Valitors, í stjórn Við­skipta­ráðs og er í stjórn ÍL sjóðs, auk ann­ars.

Ari Dan­í­els­son, sem ekki er til­nefndur til áfram­hald­andi setu í stjórn, var einn þeirra sem keypti hlut í bank­anum í útboð­inu 22. mars á síð­asta ári. Í skýrslu Fjár­mála­eft­ir­lits Seðla­bank­ans vegna sáttar við Íslands­banka kemur fram að Ari hafi fengið munn­lega und­an­þágu frá banni við þátt­töku í útboð­inu þar sem hann sat á fræðslu­fundi sem hald­inn var fyrir nýja stjórn­ar­menn, eftir að yfir­lög­fræð­ingur Íslands­banka kom inn á fund­inn og til­kynnti um að útboðið væri hafið. Und­an­þágan hafi svo verið stað­fest skrif­lega af reglu­verði, í tölvu­póst­sam­skiptum að morgni næsta dags. Hún var hins vegar ekki skráð fyrr en tveimur dögum síðar, eftir að útboðið var um garð gengið. Félag í eigu Ara, skráð í Lúx­em­borg, keypti fyrir tæpar 55 millj­ónir króna í útboð­inu. Ari hafði komið nýr inn í stjórn­ina nokkrum dögum áður en útboðið fór fram.

Finnur Árnason sagði í við­tali við Heim­ild­ina 28. júní síð­ast­lið­inn að hann hyggð­ist gefa áfram kost á sér í stjórn bank­ans. Finnur kom nýr inn í stjórn­ina á sama tíma og Ari. Spurður hvort hann bæri ekki ábyrgð á þeim brotum sem framin voru við útboðið svar­aði Finnur því til að hann hefði borið form­lega ábyrgð á útboð­inu en hefði ekki komið að ferl­inu þar eð hann hefði bæði verið nýkom­inn inn í stjórn­ina og að stjórnin hefði ekki haft aðkomu að sölu­ferl­inu.