Kvika banki hefur slitið samrunaviðræðum við Íslandsbanka. Þetta kemur fram í tilkynningu sem send hefur verið til Kauphallar Íslands, en viðræður um samrunann hafa staðið yfir undanfarna mánuði. Þar segir að í ljósi „atburða síðustu daga og þess að fyrirséð er að boðað verði til hluthafafundar hjá Íslandsbanka og mögulegs stjórnarkjörs, telur stjórn Kviku ekki forsendur til þess að halda samningaviðræðum áfram. Þó er ljóst að ávinningur af samruna félaganna gæti orðið verulegur og hefur stjórn Kviku lýst yfir vilja sínum til þess að hefja viðræður að nýju ef forsendur skapast.“

Þar er vísað til þess að Íslandsbanki skrifaði um síðustu helgi undir sátt við Fjármálaeftirlitið Seðlabanka Íslands þar sem bankinn játaði á sig margháttuð lögbrot í tengslum við sölu á 22,5 prósent hlut í honum í mars í fyrra. Vegna þessara lögbrota samþykkti Íslandsbanki að greiða næstum 1,2 milljarða króna sekt í ríkissjóðs, sem er rúmlega þrettán sinnum meira en fjármálafyrirtæki hefur áður greitt í sekt áður hérlendis. 

Íslandsbanka sendi frá sér eigin tilkynningu í dag vegna viðræðuslitanna þar sem segir að stjórn bankans sé „sammála þeirri niðurstöðu að rétt sé að slíta samrunaviðræðum.“

Hörð gagnrýni og bankastjórinn farinn

Í kjölfar þess að sátt Íslandsbanka við Fjármálaeftirlitið var gerð opinber á mánudag hefur bankinn sætt harðri gagnrýni fyrir það framferði sem þar er lýst, og það hvernig stjórn og stjórnendur hans hafa haldið á málum eftir að lögbrotin voru opinberuð. Gagnrýnin hafði meðal annars verið sett fram af leiðtogum ríkisstjórnarinnar sem annað hvort sögðu beint, eða gáfu sterkt til kynna, að stjórnendur bankans þyrftu að axla ábyrgð með einhverjum hætti. 

Síðdegis á þriðjudag fór fram stjórnarfundur í Íslandsbanka þar sem sú staða sem var uppi var til umfjöllunar. Sá fundur stóð fram á nótt og á honum var komist að þeirri niðurstöðu að Birna Einarsdóttir, bankastjóri Íslandsbanka, myndi ljúka störfum hjá bankanum. Tilkynning þess efnis var send á fjölmiðla klukkan 3:51 aðfaranótt miðvikudags. Þar var haft eftir Birnu að með afsögn sinni væri hún að axla ábyrgð á sínum þætti málsins. „Umræðan hefur verið óvægin og ýmsum stjórnmálamönnum hefur verið tíðrætt um afsögn mína. Ég óska þeim velfarnaðar í þeirra störfum.“

Pólitíkin hefur haft áhrif

Samkvæmt upplýsingum Heimildarinnar hefur verið töluvert mótstaða við sameiningu Íslandsbanka og Kviku innan ríkisstjórnar Íslands, það er frá ráðherrum Vinstri grænna og Framsóknarflokks. Það þyki ekki tilhlýðilegt að ráðast í sameiningu á ríkisbanka og áhættusæknum fjárfestingabanka, sem leiði af sér að hlutur ríkisins í sameinuðum banka yrði minni en sá 42,5 prósent hlutur sem það á í Íslandsbanka í dag.

Auk þess er framundan hluthafafundur í Íslandsbanka, sem fer fram 28. júlí næstkomandi, þar sem mögulegt er að fari fram stjórnarkjör. Við slíkar aðstæður séu engar forsendur til staðar til að halda áfram með sameiningaviðræður. 

Ætluðu að taka ákvörðun á öðrum ársfjórðungi

Samrunaviðræðurnar hófust í byrjun febrúar þegar stjórn Kviku óskaði eftir þeim við stjórn Íslandsbanka. 

Í tilkynningu til Kauphallar Íslands sagði að stjórn fyrrnefnda bankans teldi að samruni félaganna myndi skapa fjárhagslega sterkt fjármálafyrirtæki með dreifðan tekjugrunn. „Í sameinuðu félagi væri mögulegt að veita viðskiptavinum aukna þjónustu og leiða til meiri samkeppni á fjármálamarkaði, meðal annars með fjártæknilausnum, auk þess sem sameinað félag yrði áhugaverður fjárfestingakostur.“

Þar sagði ennfremur að ekki þætti ástæða til að ákveða á þeirri stundu hvor bankanna yrði yfirtökufélagið eða hvort og að hvaða marki dótturfélög bankanna myndu sameinast en það færi eftir heildarmati á viðskiptalegum, skattalegum og samkeppnislegum sjónarmiðum sem myndu eiga sér stað ef formlegar viðræður myndu hefjast.

Í byrjun maí, fyrir tæpum tveimur mánuðum, var svo send önnur tilkynning þar sem sagði að viðræðurnar stæðu enn yfir og að stjórnir beggja banka teldu að „verulegur ávinningur geti falist í samrunanum fyrir bæði hluthafa og viðskiptavini beggja félaga.“

Verkefnið væri þó umfangsmikið og unnið væri að þvi, með aðkomu ráðgjafa, að meta samlegð af samrunanum og meta stöðu sameinaðs félags á markaði. „Á öðrum ársfjórðungi munu fjárhagslegir ráðgjafar skila greiningum sínum á mögulegum samruna og í kjölfar þess munu félögin taka ákvarðanir um næstu skref í ferlinu.“

Öðrum ársfjórðungi lýkur á miðnætti á morgun og því lá ljóst fyrir að ákvörðunar um framhald viðræðnanna var væntanleg fyrir vikulok.