Hrefna Líf Ólafs­dóttir var ófrísk af dóttur sinni þegar verk­föll starfs­fólks í leik­skólum í Reykja­vík, þar sem hún var búsett, hófust vorið 2020. Þá var sonur hennar þriggja ára og raskaði verk­fallið því lífi fjöl­skyld­unnar. Nú er árið 2023 og fjöl­skyldan búin að koma sér fyrir í Kópavogi. Og þá skellur annað verk­fall á í leik­skólum, nú í Kópavogi og fleiri sveit­ar­fé­lögum utan Reykja­víkur. 

Hrefna fór því reynsl­unni rík­ari inn í verk­falls­að­gerðir félags­fólks BSRB sem starfar í leik­skólum. Á ísskáp fjöl­skyld­unnar er vak­taplan sem segir til um það hver sér um börnin á hvaða tíma og hvaða stundir dags­ins leik­skól­inn geti séð um þau. 

Hrefna er óvenju róleg miðað við for­eldri sem hefur varla getað skipu­lagt sig mikið lengra fram í tím­ann en einn dag í einu vegna þess hve hratt dag­skrá leik­skól­ans hefur breyst í verk­fall­inu. Hún stillir vænt­ingum sínum í hóf í þetta skiptið.

„Ég var alltaf mjög bjart­sýn á að þetta myndi leys­ast þegar ég bjó í Reykja­vík, þá hafði ég ekki upp­lifað þetta í nærum­hverfi áður,“ segir Hrefna. Það verk­fall stóð í tæpan mánuð og var vegna kjara­deilu félags­fólks Eflingar og Reykja­vík­ur­borgar. Ekki löngu seinna fór kór­ónu­veiran af stað og raskaði starf­semi leik­skól­anna. 

„Núna ein­hvern veg­inn er ég ekki með neinar vænt­ingar og er frekar bara að reyna að redda pössun,“ segir Hrefna. „Mér fannst fátt ganga upp og allt var svo sein­legt síð­ast, ég trúði því ekki að verk­fall gæti enst svona lengi fyrir svona mik­il­vægt starf fyrir fólk sem er að sinna svona mik­il­vægum störfum.“

Í um fjórar vikur hafa verk­föll um 2.500 félags­manna BSRB sem starfa í leik­skólum, íþrótta­mann­virkjum og víðar í nokkrum sveit­ar­fé­lögum, raskað lífi almenn­ings. Stétt­ar­fé­lagið og Samband íslenskra sveit­ar­fé­laga hafa ekki náð saman í deilu um kjör fólks­ins. BSRB hefur gert kröfu um 128.000 króna ein­greiðslu fyrir 7.000 félags­menn sem fengu minna greitt á fyrstu mán­uðum árs­ins en fólk í sömu störfum sem er í Starfs­greina­sam­band­inu. BSRB segir kröf­una ófrá­víkj­an­lega en Samband íslenskra sveit­ar­fé­laga vill ekki gang­ast við kröf­unni þar sem hún rímar ekki við kjara­samn­ing­inn sem gerður var við BSRB árið 2020. 

Hádegismatur á bílastæði leikskólans

Síð­ast­liðnar vikur hefur Hrefna og hennar nán­asta fjöl­skylda sótt systk­inin í leik­skól­ann ýmist eftir hálfan dag eða komið við til þess að gefa þeim að borða í hádeg­inu þar sem starfs­fólk skorti. Oftar en ekki fór hádeg­is­mat­ur­inn fram á bíla­stæð­inu því ekki gafst tími til þess að skjót­ast heim og svo aftur í leik­skól­ann. 

Hrefna seg­ist frekar heppin miðað við marga for­eldra þar sem hún getur unnið heima. Það geti aftur á móti ekki allir og þá vand­ast málið. Þá býr hún einnig að góðu stuðn­ings­neti sem sam­anstendur af móður hennar og tengda­for­eldrum. 

„Ef ég hefði þau ekki væri ég örugg­lega mjög ósátt,“ segir hún.  

Börnunum líður ágæt­lega þó að þau skilji ekki fylli­lega hvað er um að vera. Það erf­ið­asta er að útskrift sonar Hrefnu úr leik­skól­anum raskast vegna verk­falls­ins. Hann og sam­nem­endur hans hafa í nokkurn tíma æft lög og leik­rit fyrir útskrift­ina og eru spennt fyrir að leika listir sínar fyrir kenn­ara og for­eldra. Það eru því von­brigði fyrir börnin að starfs­fólk í verk­falli muni ekki geta mætt. 

Áfram sér ekk­ert til lands í deilu BSRB og Sambands íslenskra sveit­ar­fé­laga. Eitt er þó víst, að þetta er í annað og síð­asta skiptið sem sonur Hrefnu mun upp­lifa leik­skóla­verk­fall sem nem­andi. Hann er enda að útskrif­ast.