Fyrri aukaspurning:

Hvað heitir íslenska fjölmiðlakonan á myndinni hér að ofan?

***

Aðalspurningar:

1.  Hversu margir hólmar eru í stóru Tjörninni í Reykjavík?

2.  The Travelling Wilburys var svonefnd „súpergrúppa“ sem starfaði 1988-1990 og gaf út tvær hljómplötur. Meðlimir hljómsveitarinnar voru upphaflega fimm og allir víðkunnir af fyrri störfum sínum við popp og rokk. Til að fá stig dugar að nefna tvo meðlimi en þeir sem þekkja alla fimm fá lárviðarstig!

3.  Eins og hálfs kílómetra löng brú í borg einni heitir opinberlega frá 2016 Brú píslarvottanna 15. júlí. Brúin er hins vegar mun eldri og er víst yfirleitt kölluð Fyrsta brúin af heimamönnum. Hún var líka fyrsta brúin sem tengdi saman heimsálfur. Í eða við hvaða borg er Fyrsta brúin?

4.  Hvað hét sá breski karl sem leiddi Verkamannaflokkinn til sigurs í þrennum kosningum í röð — en það hefur enginn annar gert?

5.  Hvar eru aðalstöðvar Íslenskrar erfðagreiningar?

6. Japurá, Juruá, Madeira, Negro, Purus og Xingu eru þverár, sem falla í hvaða stórfljót?

7.  Hvaða fótboltafélag í fremstu röð á Englandi spilar í röndóttum svörtum og hvítum búningum?

8.  En hvaða fótbotafélag á Íslandi spilar einnig í þannig búningum?

9.  Karl að nafni Little fæddist í Bandaríkjunum 1925, leiddist ungur út í glæpi en gerðist síðan aktífisti mikill, til að byrja með á vegum samtaka sem þá létu að sér kveða. Seinna fjarlægðist hann mjög þau samtök. Er hann gerðist baráttumaður lagði hann á hilluna nafnið Little. Í staðinn varð hann víðkunnur undir öðru síðara nafni, mjög stuttu. Hvað kallaði hann sig?

10.  Ekki fór betur en svo að hann var myrtur 39 ára gamall og það af mönnum sem tilheyrðu samtökunum sem hann hafði áður barist með. Hvað nefndust þau samtök?

***

Seinni aukaspurning:

Hér má sjá eyju eina mjög afskekkta sem margir hafa heyrt nefnda en líklega fremur fáir komið til, enda fjarlæg Íslandi. Þó er eftirsótt að komast þangað. Hvað heitir eyjan?

***

Svör við aðalspurningum:

1.  Tveir.

2.  Bob Dylan, George Harrison, Jeff Lynne, Roy Orbison og Tom Petty.

3.  Istanbúl.

4.  Tony Blair.

5.  Í Vatnsmýrinni í Reykjavík. Ekki dugar að nefna Reykjavík.

6.  Amason.

7.  Newcastle.

8.  KR.

9.  Malcolm X.

10.  Nation of Islam.

***

Svör við aukaspurningum:

Á efri myndinni er Lóa Pind.

Á neðri myndinni er Páskaeyja eða Rapa Nui.