Fyrri aukaspurning:

Sjá myndina hér að ofan. Við vitum ekki hvað hún kallaði sig sjálf. En hvað köllum við hana?

***

Aðalspurningar:

1.  Agnes M. Sigurðardóttir er biskup Íslands. M-ið í nafni hennar er ekki seinna skírnarnafn, heldur móðurnafn hennar. Hvað hét móðir hennar?

2.  Hvaða dýr nefnist á latínu equus?

3.  Árið 1996 vann Daninn Bjarne Riis mikið íþróttaafrek, fyrsti og (þangað til í fyrra) eini Daninn sem það hefur gert. Vakti afrek Riis hans mikla athygli og höfðu Danir Riis lengi í hávegum vegna þess. Hvaða keppni vann Bjarne Riis?

4.  Fuerteventura, Lanzarote, La Palma, La Gomera og El Hierro eru örnefni á tilteknum stað. Það mætti reyndar bæta við tveim örnefnum í viðbót en þá yrði spurningin of létt. Hvaða staður er þetta?

5.  Í landi einu tíðkast sá siður að þegar nýr þjóðhöfðingi tekur við, þá er valið á hann nýtt nafn. Embættistíð hans er svo kennd opinberlega við þetta nýja nafn. Þetta gerðist síðast 2019 þegar nýr þjóðhöfðingi tók við og hlaut nafnið Reiwa. Hvaða land er hér um að ræða?

6.  Í „aðeins“ 1.500 kílómetra fjarlægð frá Íslandi er hafsvæði eitt fremur grunnt. Togarar hafa þar oft fengið bein loðfíla og risanashyrninga í veiðarfæri sín. Hvað heitir hafsvæðið?

7.  Íslenskur rithöfundur skrifaði eingöngu fyrir börn — nema hvað ein bók að nafni Oddaflug kom út árið 2000 fyrir fullorðna. Hver er höfundurinn?

8.  Í landi einu sjálfstæðu er konungsstjórn. Titill konungsins á máli heimamanna er Druk Gyalpo, sem þýðir „drekakonungurinn“. Drekakóngur síðan 2006 hefur verið karl sem nú er rúmlega fertugur og heitir Jigme Khesar Namgyel Wangchuck. Hvaða land er hér um að ræða?

9.  Hver af þessum postulum er EKKI einn af postulum Jesúa frá Nasaret: Andrés, Bartólómeus, Filippus, Jakob Alfeusson, Jakob Zebedeusson, Jóhannes, Júdas Ískaríot, Júdas Taddeus, Matteus, Sál frá Tarsus, Símon Pétur, Símon selóti, Tómas vantrúaði.

10.  Í hvaða fljóti á Austurlandi var gjarnan talið búa skrímsli af einhverju tagi?

***

Seinni aukaspurning:

Skjáskotið hér að neðan er úr nýrri íslenskri kvikmynd. Hvað heitir hún?

***

Svör við aðalspurningum:

1.  Margrét, svo fullt nafn biskups er Agnes Margrétardóttir Sigurðardóttir.

2.  Hestur.

3.  Tour de France hjólreiðakeppnin.

4.  Kanaríeyjar.

5.  Japan.

6.  Hið kórrétta svar er Dogger Bank en ég gef líka rétt fyrir Norðursjó.

7.  Guðrún Helgadóttir.

8.  Bhutan.

9.  Sál frá Tarsus, síðar nefndur Páll. Hann tók sér sjálfur postulanafnbót en Jesúa valdi hann ekki, svo staða hans var allt önnur en hinna.

10.  Lagarfljóti.

***

Svör við aukaspurningum:

Á efri myndinni er endurgerð af suðurapanum Lucy, sem svo hefur verið kölluð.

Á neðri myndinni er skjáskot úr nýju kvikmyndinni Napóleonsskjölin.