Róbert Wessman, stofnandi og stjórnarformaður Alvotech, sest í forstjórastól fyrirtækisins í byrjun næsta árs. Núverandi forstjóri, Marck Levick, hefur ákveðið að víkja úr forstjórastólnum. Samkvæmt tilkynningunni mun Róbert halda áfram í stöðu sinni sem stjórnarformaður fyrirtækisins. 

Gustað hefur um Róbert og umrædd fyrirtæki en tilkynning um forstjóraskipti kemur tíu dögum eftir að greint var frá því að sættir hefðu náðst á milli systurfélags Alvotech, Alvogen, og Halldórs Kristmannssonar, fyrrverandi framkvæmdastjóra hjá síðarnefnda féalginu. Í þeirri sátt fólst meðal annars að Alvogen hætti við málsókn á hendur Halldóri.

Upphaf málsins má rekja til þess að Halldór sendi í mars á síðasta ári frá sér yfirlýsingu þar sem hann skoraði á stjórnir félaganna tveggja að víkja Róberti frá störfum sökum ógnandi hegðunar hans, sem meðal annars höfðu birst með líflátshótunum í sms-skilaboðum. „Ég mun taka þig niður ég mun vinna að því að drepa þig og claudio þú ert svo mikill lúser og þú veist það,“ skrifaði Róbert meðal annars til fyrrverandi samstarfsmanns síns hjá Actavis, Mark Keatley, í lok janúar 2016. Þá sendi Róbert fyrrverandi forstjóra Actavis, Claudio Albrecht, einnig sms-skilaboð. Í þeim, sem og í skilaboðum til Keatley, hótaði hann báðum lífláti, sakaði þá um svik og jós yfir þá fúkyrðum. Það sem mennirnir tveir höfðu unnið sér til saka í bókum Róberts var að bera vitni í skaðabótamáli Björgólfs Thors Björgólfssonar á hendur Róberti.

Þá greindi Halldór, sem starfaði um árabil sem einn nánasti samstarfsmaður Róberts, frá því að Róbert hefði, drukkinn á viðburðum á vegum Alvogen erlendis, kýlt sig í andlitið, fyrirvaralaust og í vitna viðurvist. „Þegar ég síðar nefndi þetta við Róbert sagð­ist hann hafa verið að grín­ast og við hefðum verið í kýl­inga­leik,“ sagði í yfirlýsingu Halldórs sem sagðist ekki kannast við það almennt að forstjórar fyrirtækja væru í slíkum leikjum við samstarfsmenn.

Halldór sagði einnig að Róbert hefði beitt sig óeðlilegum þrýstingi til að koma höggi á óvildarmenn sína, með neikvæðri fjölmiðlaumfjöllun.

Í yfirlýsingu sem stjórn Alvotech sendi frá sér í fyrra, þegar málið kom upp, kom fram að óháð nefnd og alþjóðleg lögfræðistofa hefðu farið yfir ásakanir á hendur Róberti og að ekkert benti til þess að nokkuð væri athugavert við stjórnunarhætti hans.

Alvogen stefndi Halldóri fyrir brot í starfi og er það umrætt mál sem sættir náðust í fyrir tíu dögum. Halldór lýsti því yfir að hann hefði ekki stöðu uppljóstrara lengur og að hann mynda una niðurstöðu stjórnar um traust á hendur Róberti.

Róbert sat áfram sem forstjóri Alvogen en lét síðar af þeim störfum. Hann er hins vegar stjórnarformaður félagsins og starfandi stjórnarformaður Alvotech.