Nýr varaforseti Alþýðusambands Íslands verður kynntur í dag og segir Sólveig Anna Jónsdóttir, fyrrverandi formaður Eflingar, að það verði Halldóra Sveinsdóttir, formaður verkalýðsfélagsins Bárunnar á Selfossi. Fullyrðir Sólveig Anna að með skipun Halldóru muni hafin vinna á fullum krafti við að endurvekja SALEK-samkomulagið.

„Halldóra er einn af dyggustu liðsmönnum gömlu verkalýðshreyfingarinnar, þeirrar sem leidd var af Gylfa Arnbjörnssyni og studd af þáverandi forystu Eflingar sem ég og B-listinn sigruðum í kosningum 2018,“ skrifar Sólveig Anna í færslu á Facebook-síðu sinni. Hún segir að stóri draumur þessara leiðtoga gömlu verkalýðshreyfingarinnar, eins og hún orðar það, hafi verið SALEK-samkomulagið sem hafi verið endnaleg fullkomnun þess verkefnis að taka alla lýðræðislega stjórnun kjaramála úr höndum launafólks sjálfs og setja það í hendur sérfræðinga. „Ágreiningi milli verkalýðshreyfingarinnar og atvinnurekenda yrði lokið í eitt skipti fyrir öll, sjálfstæður samningsréttur stéttarfélaga afnuminn og verkfallsvopnið aflagt.“

Unnið að SALEK-samkomulaginu

Í færslunni rekur Sólveig Anna að þrátt fyrir að miklar breytingar hafi orðið á forystu Eflingar og VR, með tilheyrandi breyttum áherslum og vinnubrögðum, þá sé staðreynd að verkefnum hinnar gömlu forystu verkalýðshreyfingarinnar hafi aldrei verið hætt og þá sérstaklega ekki SALEK-verkefninu. Áfram hafi verið unnið að því að koma því á koppinn inni á skrifstofum ASÍ og í ráðuneytum, af sérfræðingum og starfsfólki sem starfi án nokkurs lýðræðislegs umboðs frá félagsfólki verkalýðshreyfingarinnar.

„Ríkisstjórnin sá þannig ekkert athyglisvert við það að reyna að smygla endurvakningu SALEK-samkomulagsins, undir nafninu „Grænbók“, inn í yfirlýsingu sína vegna Lífskjarasamninganna árið 2019,“ skrifar Sólveig Anna og segir það hafa verið gert með samþykki ASÍ, undir forystu Hennýar Hinz, hagfræðings sambandsins. Henný hafi síðar farið til starfa í forsætisráðuneytinu við framhald sama verkefnis. Aldrei hafi verið rætt við Sólveigu Önnu sjálfa eða samninganefnd Eflingar um málið. Ef ekki hefði verið fyrir hávær mótmæli Eflingarfélaga síðasta vetur hefði tekist að endurvekja SALEK-samkomulagið.

Andstaðan vakti úlfúð

„Það hefur ekki farið hátt, en gagnrýni Eflingar á Grænbókarvinnuna sem náði að stöðva verkefnið í bili, vakti mikla úlfúð í verkalýðshreyfingunni, sérstaklega frá varðmönnum gömlu hreyfingarinnar. Þeir voru mjög reiðir yfir því að þessi vinna hafi ekki fengið að rúlla áfram. Fremst í flokki þessara varðmanna var Halldóra Sveinsdóttir,“ skrifar Sólveig Anna enn fremur. Greinir hún frá því að Halldóta hafi efnt til leynifundar í febrúar síðastliðnum þar sem fimmtán formönnum aðildarfélaga Starfsgreinasambandsins hafi verið boðið og umræðuefnið hafi verið hvernig hægt væri að styðja við áframhaldandi vinnu við Grænbókina, án þess að taka þyrfti tillit til sjónarmiða þeirra sem andvígir væru henni innan Starfsgreinasambandsins. Sólveigu Önnu hafi ekki verið boðið á þann fund, þrátt fyrir að hafa á þeim tíma verið varaformaður Starfsgreinasambandsins.

Sólveig Anna segir þá að eftir að Halldóra muni verða skipuð varaforseti ASÍ muni hún „að sjálfsögðu“ hefja vinnu af fullum krafti við að endurvekja SALEK-samkomulagið. „Ef sú vinna verður einhvern tíma kynnt fyrir félagsfólki í hreyfingunni þá spái ég því að það verði á formi glærukynningar frá sérfræðingi, en Halldóra víðs fjarri.“