Í Afganistan standa fjórtán milljón íbúar frammi fyrir alvarlegu fæðuóöryggi og 95% heimila í þar í landi eiga ekki nóg að borða. Þá er einnig ljóst að 3,2 milljónir barna undir fimm ára aldri munu glíma við bráða vannæringu það sem eftir lifir þessa árs og ein milljón þeirra verður í bráðri lífshættu án meðhöndlunar. Þetta kemur fram í fréttatilkynningu UNICEF.
Hervé Ludovic De Lys, yfirmaður UNICEF í Afganistan og Mary Ellen McGroarty yfirmaður Matvælaáætlunar Sameinuðu þjóðanna, heimsóttu borgina Herat í Afganistan sem nú er undir stjórn Talibana. Eftir tveggja daga heimsókn ákváðu þau að senda frá sér sameiginlegt neyðar ákall til heimsbyggðarinnar vegna stöðu mála þar í borg sem og landinu öllu.
Ófremdarástand í Herat
Dagblaðið The Washington Post fjallaði í dag einnig um ástandið í borginni Herat undir stjórn Talibana. Þar segir að í þrjá daga og nætur hafa lík fjögurra meintra mannræningja hangið úr byggingakrönum. Þrjú þeirra hafa verið látin hanga yfir fjölförnu umferðartorgi fyrir alla borgarbúa að sjá. Talsmenn Talíbana í Herat hafa sagt gjörninginn vera skilaboð um ekkert umburðarlyndi og skjóta réttvísi fyrir þá sem brjóta lögin.
Síðastliðinn þriðjudag var önnur óhugnanleg tilraun gerð til þess að sýna fram á afstöðu Talibana gegn glæpum í borginni Herat. Lík þriggja meintra ræningja voru látin hanga úr byggingar gröfum fyrir alla að sjá. Þessar refsingar Talibana hafa ekki verið tilkynntar í öðrum borgum landsins fram að þessu.
Gat ekki lengur haft barnið á brjósti
De Lys og McGroarty hittu í Herat móðurina Jahan Bibi sem á 18 mánaða gamla dóttur sem nú liggur inni á sjúkrahúsi í borginni til að fá meðferð við alvarlegri bráðavannæringu. Jahan kom með dóttur sína vannærða á sjúkrahúsið því hún gat ekki lengur gefið henni brjóst vegna hungurs. „Við eigum engan mat heima. Við erum að selja allt sem við eigum til að kaupa mat, en samt á ég ekkert að borða. Ég er veikburða og framleiði ekki neina mjólk fyrir barnið mitt,“ sagði Jahan.
Samkvæmt könnun sem Matvælaáætlun Sameinuðu þjóðanna lét framkvæma kom í ljós að 95% af heimilum í Afganistan fá ekki nóg að borða. Fullorðnir borði minna og sleppi máltíðum svo börn þeirra geti fengið meira. „Við höfum gríðar miklar áhyggjur af þessum fórnum sem fjölskyldur neyðast til að færa,“ segir McGroarty.
„Ég er veikburða og framleiði ekki neina mjólk fyrir barnið mitt“
„Ef Við gerum ekki meira núna mun vannæring aðeins verða stærra vandamál og alvarlegra. Alþjóðasamfélagið verður að láta af hendi fjármagnið sem okkur var lofað fyrir nokkrum vikum. Ef ekki, gætu áhrifin orðið óafturkallanleg.“
Að sögn De Lys hrakar heilsu barna og mæðra í Afganistan mjög hratt meðal annars vegna þess að þau hafa ekki aðgang að hreinu vatni. „Börn eru að veikjast og fjölskyldur geta ekki sótt nauðsynlega meðferð. Faraldur mislinga og niðurgangs vegna óhreins vatns mun aðeins auka á þessa neyð,“ segir hann.
Athugasemdir