Kynningarmyndband frá Morii, nýrri ferðaskrifstofu, sýnir stofnendur hennar leggja bifreið sinni utan vegar á barmi gígsins Rauðuskálar. Fyrirtækið auglýsir pakkaferðir á Íslandi í sumar en hefur ekki sótt um eða fengið leyfi fyrir starfseminni hjá Ferðamálastofu.
Myndbandið var birt á Twitter síðu fyrirtækisins, en síðan eytt. Í myndbandinu sitja stofnendur Morii, þeir Terry Zhang og Blakelock Brown, ásamt þriðju manneskju ofan á bifreið sem lagt á barmi Rauðaskálar. Texti í myndbandinu segir á ensku: „Við fundum óþekktan stað á Íslandi“.
Nokkuð hefur verið um utanvegaakstur á svæðinu í gegnum tíðina, en gígurinn er í nágrenni Heklu. Daníel Freyr Jónsson, sérfræðingur hjá Umhverfisstofnun, segir ljóst af myndbandinu að um utanvegaakstur hafi verið að ræða og að ábendingar hafi borist vegna myndbandsins um helgina. „Við fáum reglulega ábendingar um utanvegaakstur og myndbönd send,“ segir hann. „Þetta er dálítið algengt í nágrenni Heklu. Við höfum áður heyrt af bílum þarna. Það er merktur slóði upp undir Rauðaskál, en hann fer ekki upp á gígbarminn. Bíllinn er þarna kominn á ystu brún á gígskálinni.“
Daníel bendir hins vegar á að svo mikið hafi verið um akstur á svæðinu að erfitt sé að átta sig á um hvort veg sé að ræða. „Samkvæmt aðalskipulagi Rangárþings Ytra liggur vegur að gígnum úr suðri, en ekki upp á hann. Þarna hefur því verið ekið utan vega. Hins vegar er þetta dálítið snúið þar sem þarna er mikið um eldri bílför upp á gígbarminn. Við slíkar aðstæður getur því reynst nokkuð erfitt fyrir viðkomandi að átta sig á því hvar má keyra og hvar ekki. Þarna þyrfti að huga að því að afmarka bílastæðið til að koma í veg fyrir svona atvik. Bílförin upp á gígbarminn eru það mikil að þau sjást á loftmyndum,“ segir Daníel.
Hafa ekki fengið leyfi sem ferðaskrifstofa
Samkvæmt upplýsingum frá Ferðamálastofu hefur Morii ekki verið veitt leyfi ferðaskrifstofu. Aðilar sem bjóða upp á pakkaferðir þar sem gisting er innifalin þurfa að hafa slíkt leyfi. Þá þarf umsókn að hafa borist tveimur mánuðum áður en starfsemi á að hefjast, en Ferðamálastofa segir umsókn frá Morii ekki hafa borist. Á vef fyrirtækisins er hægt að bóka ferðir sem hefjast nú þegar í júlí.
„Bílförin upp á gígbarminn eru það mikil að þau sjást á loftmyndum“
Morii býður upp á 7 daga pakkaferðir til Íslands þar sem lofað er ferðum á staði sem „99 prósent af túristum missa af“. Inni í ferðinni eru gisting, máltíðir, 60 mínútna útsýnisflug og ferðir til og frá staða í fjórhjóladrifnum bíl. Pakkaferðirnar kosta frá 6.000 dollurum á mann, andvirði um 740 þúsund króna. Fyrirtækið leggur áherslu á að ferðirnar hafi neikvætt kolefnisfótspor og er rífleg kolefnisjöfnun innifalin í verðinu.
Morii hefur ekki svarað fyrirspurn Stundarinnar um málið.
Athugasemdir