Blaðamenn eru „ótrúlega miklir aumingjar“

„Menn eru bara að fara á taugum af því að þetta snýr að ein­hverjum blaða­mönnum. Þið eruð svo sjálf­hverfir, þið eruð svo ótrú­lega miklir aum­ingjar, þið eruð alveg ótrú­legir,“ sagði Brynjar Níelsson, þing­maður Sjálf­stæð­is­flokks­ins í útvarps­þætti Harma­geddon í gær þar sem „skæru­liða­deild“ Samherja var umræðu­efnið. Helga Vala Helga­dóttir, þing­kona Sam­fylk­ing­ar­innar, var einnig til við­tals í þætt­inum. 

Réttmæt vörn Samherja

Að mati Brynjars eru þau vinnu­brögð „skæru­liða­deildar“ Samherja sem Stundin og Kjarninn hafa fjallað um, rétt­mæt vörn fyr­ir­tæk­is­ins. „Þetta er fyr­ir­tæki sem er djöfl­ast á alla daga,“ sagði Brynjar og hélt því svo fram að málið í heild sinni væri „nauða­ó­merki­legt“.

Stóra álita­efnið að hans mati sé það að gögn­unum hafi verið stolið. „Stóra málið og sið­leysið í þessu er að vera birta ein­hver gögn, stolin gögn um skoð­anir fólks sín á milli,“ sagði hann. Ekkert af því sem birt­ist í umfjöllun Stund­ar­innar segir hann kalla á það að almenn­ingur fái aðgang og sé upp­lýstur um þær aðferðir sem stjórn­endur Samherja og starfs­fólk á þeirra vegum hefur beitt bæði blaða­menn og aðra. 

„Þið eruð svo ótrú­lega miklir aum­ingjar, þið eruð alveg ótrú­legir“

Ástæðuna fyrir því að málið hafi vakið slíka athygli segir hann vera vegna þess að það snúi að blaða­mönnum. „Það eru allir að beita sér í ein­hverju (...) en af því að þetta er Samherji og ein­hverjir blaða­menn þá fer allt á annan end­ann.“ Fyrr í við­tal­inu sagð­ist hann ekki skilja þessa „við­kvæmni“ í blaða­mönnum. 

Brynjar spyr í við­tal­inu hvað sé að því að skrif­aðar hafi verið greinar í nafni Páls Stein­gríms­sonar, skip­stjóra Samherja, og að fjöldi fólks hafi komið að því.  Þar að auki var hann spurður hvort hann teldi þetta eðli­leg vinnu­brögð hjá stjórn­endum Samherja og hann svar­aði að „ef ég tel blaða­mann­inn vera með óheið­ar­leg vinnu­brögð, fara með rang­indi, þá gagn­rýni ég hann, þá fer ég bara beint í hann, hvað er að því?“ Hann segir mega gagn­rýna blaða­menn „með öllum hætti“ og að þeir séu „alltof við­kvæmir“. 

Sat hjá í atkvæðagreiðslu 

Sama dag og við­talið fór fram sat Brynjar hjá í atkvæða­greiðslu um fjöl­miðla­frum­varp Lilju Alfreðs­dóttur mennta- og menn­ing­ar­mála­ráð­herra. Í sam­tali við Frétta­blaðið sagði Brynjar:  „Um leið og menn sam­þykkja svona frum­varp er alltaf hætta á að þessi leið beinna rík­is­styrkja fest­ist í sessi“ og bætti síðar við:  „Svo kemur að því að fram­lögin duga ekki lengur til að halda líf­inu í fjöl­miðlum og þá kemur krafan um hærri styrki.“

Í áður umræddu við­tali við Harma­geddon sagð­ist Brynjar átta sig á mik­il­vægi fjöl­miðla en þeir væru ekki fjórða valdið eins og þeir hafa verið skil­greindir enda hefðu þeir „ekk­ert vald“.