Föstu­dag­inn 6. nóv­em­ber hengdi Martyna Dobrowolska upp borða sem hangir fyrir utan heim­ili hennar að Sól­valla­götu þar sem sjónum er beint að sendi­herra Póllands sem býr beint á móti. Á borð­anum er varpað fram þeirri spurn­ingu hvar sendi­herr­ann sé nú þeg­ar pólsk­um kon­um er stefnt í hættu vegna lög­gjaf­ar um þung­un­ar­rof.

Martyna segir að í kjöl­farið hafi leigusal­inn tjáð henni að lög­reglan hefði haft sam­band vegna kvört­unar frá sendi­herra Póllands, Gerard Pokruszyński, vegna borð­ans. Stundin fjall­aði um málið og óskaði eftir við­brögðum frá sendi­herr­anum, sem svar­aði ekki fyr­ir­spurn blaðs­ins. Í yfir­lýs­ingu á vef­síðu pólska sendi­ráðs­ins sem birt var þann 12. nóv­em­ber er frá­sögn Martynu af afskiptum sendi­herr­ans sögð vera lygi.

Þar segir Pokruszyński að mót­mæli séu eðli­leg. „Í lýð­ræð­is­ríki eins og Póllandi og Íslandi hafa allir rétt á því að mót­mæla og tjá skoðun sína, og það væri hneyksl­is­mál“ ef sendi­herra myndi láta fjar­lægja slíkan borða með valdi. Lög­reglan hafi hins vegar verið kölluð til vegna „inn­rásar á einka­lóð sendi­herr­ans“ sem er vernduð með alþjóða­lögum. 

Innrásin var lagning í einkastæði

Stundin hafði sam­band við lög­regl­una og var tjáð að engin kvörtun hafi verið bókuð frá sendi­herra vegna borð­ans, en að haft hafi verið sam­band við Martynu vegna þess að búið var að leggja í einka­stæði sendi­herr­ans. Sam­býl­is­fólk Martynu segir í sam­tali við Stundina að lög­reglu­þjónn hafi bankað upp á hjá þeim að kvöldi þess 6. nóv­em­ber út af bíla­stæð­inu. Í því sam­tali hafi hann minnst á að þau þyrftu að fjar­lægja borð­ann. Þegar lög­reglu­þjónn­inn var spurður hvaða lög þau væru að brjóta með því að hengja borð­ann upp á lög­reglu­þjónn­inn að hafa sagt að hann vissi það ekki en ætl­aði að kom­ast að því. Nágranni þeirra varð einnig vitni að þessum sam­skiptum.

Martyna segir að hún hafi fengið með­byr með mót­mæla­verk­inu úr pólska sam­fé­lag­inu. Eftir að hafa ráð­fært sig við lög­fræð­inga hefur hún ákveðið að fjar­lægja ekki borð­ann heldur leyfa honum að vera.

Sendi­herra Póllands hefur áður látið íslenskan frétta­flutn­ing sig varða. Í nóv­em­ber 2018 sendi hann bréf á skrif­stofu for­seta Íslands, skrif­stofu for­sæt­is­ráð­herra og rit­stjórn Stund­ar­innar þar sem hann kvart­aði undan umfjöllun Stund­ar­innar um sjálf­stæð­is­göngu í Póllandi þar sem leið­togar Póllands gengu með nýnas­istum. „Ég vona að þetta muni ekki valda alvar­legum afleið­ingum og muni ekki byggja upp tregðu á milli sam­landa okkar,“ skrif­aði Pokruszynski þá og krafði blaðið um afsök­un­ar­beiðni.