Borgarfulltrúar Sjálfstæðisflokksins gagnrýna að stjórn Sorpu hafi ekki fjallað um misbresti við endurvinnslu plasts og krefjast upplýsinga um hvort Sorpa hyggist leiðrétta tölfræði um endurvinnslu Reykjavíkurborgar í ljósi þeirra upplýsinga.

Í umfjöllun í síðasta tölublaði Stundarinnar kom fram að endurvinnsla á plasti sem íslenskir neytendur nota sé langtum minni en opinberar tölur gefa til kynna og að íslensk fyrirtæki fái oft greitt fyrir að endurvinna plast sem ratar aldrei í endurvinnslu. Fram kom að Sorpa hafi ekki sett endurvinnslu plasts í forgang og að stór hluti plastsins endi hjá umdeildu sænsku fyrirtæki sem brenni það í sementsverksmiðju.

Fulltrúar Sjálfstæðisflokksins í borgarráði, þau Eyþór Arnalds, Hildur Björnsdóttir og Marta Guðjónsdóttir vöktu athygli á málinu í umræðum um fundargerð Sorpu á fundi ráðsins í gær. Sögðu þau athygli vekja að ekki hefði verið rætt um málið á stjórnarfundi Sorpu, þegar að fullt tilefni hafi verið að ræða um endurvinnslu plasts og brotalamir í því ferli.

Fulltrúar meirihluta Samfylkingarinnar, Viðreisnar, Pírata og Vinstri grænna bentu á að fundargerð Sorpu sem rætt hafi verið um væri frá 9. október, áður en umfjöllun Stundarinnar var birt 23. október. „Nú er stjórn SORPU fjölhæf og fá málefni henni óviðkomandi en ekki býr hún svo vel að eiga tímavél til að ferðast í framtíðina til að geta sett efnisumfjallanir einstaka fjölmiðla á dagskrá fundar áður en þær birtast í þessum sömu fjölmiðlum.“

„Almenningur greiðir gjald vegna plasts sem á að nota í endurvinnslu“

Fulltrúar Sjálfstæðisflokksins bentu hins vegar á að í umfjöllun Stundarinnar hafi komið fram að Sorpa hafi verið upplýst um yfirvofandi umfjöllun og svarað fyrirspurnum vegna málsins. „Almenningur greiðir gjald vegna plasts sem á að nota í endurvinnslu,“ segir í bókun Sjálfstæðisflokksins. „Misbrestur hefur verið á því og hefur komið í ljós að SORPA hefur sent efni til annarra landa þar sem því hefur verið fargað í stað þess að vera endurunnið.“

Mikinn minnihluta plasts hægt að endurvinna

Fulltrúar meirihlutans sögðu þá að hægt væri að gera mikið betur í endurvinnslu plasts og að Sorpa mundi upplýsa betur um ferlið og fyrirhugaðar aðgerðir. „Stjórn SORPU er vel kunnugt um útflutning plasts til orkuendurvinnslu. Aðeins 30% af því plasti sem kemur til endurvinnslustöðvanna og 50% af því sem kemur úr plastsöfnun við heimilin er hægt að endurvinna. Annað er sent erlendis til orkuvinnslu. Þetta plast er hins vegar bara brot af því plasti sem er í umferð því t.d. 2019 komu ca. 15.000 tonn af plasti í urðun frá rekstraraðilum og ljóst að hægt er að gera mikið betur í þeim efnum. Það er sjálfsagt að upplýsa fólk og borgarfulltrúa um feril plasts og þær aðgerðir sem fyrirhugaðar eru á Íslandi og hjá sveitarfélögum til að endurvinna og endurnýta meira og innleiða hringrásarhagkerfið og er SORPA bs. að undirbúa að slíkt verði gert.

„Þá er óskað eftir upplýsingum um hversu lengi stjórn SORPU hefur haft vitneskju um að plastið hafi ekki verið endurunnið“

Lögðu borgarráðsfulltrúar Sjálfstæðisflokksins einnig fram fyrirspurn um málið. „Hvert er heildarmagn plasts sem sent hefur verið frá SORPU til endurvinnslu erlendis frá árinu 2014-2020? Þá er óskað eftir upplýsingum um hversu lengi stjórn SORPU hefur haft vitneskju um að plastið hafi ekki verið endurunnið. Hvað hyggst stjórn SORPU bregðast við málinu og eru uppi áform um að leiðrétta tölur yfir endurvinnslu og endurnýtingu hjá Reykjavíkurborg í ljósi þessara upplýsinga?“