Eftir að Sigríður Elín Ásmunds­dóttir sagði frá alvar­legu ein­elti í garð sonar hennar, hins ell­efu ára gamla Ólivers sem gengið hefur í Sjá­lands­skóla í Garðabæ, hefur fjöldi fólks haft sam­band til að stappa í hann stál­inu. 

Á meðal þeirra eru tón­list­ar­mað­ur­inn Ingó veð­urguð, hand­bolta­mað­ur­inn Björgvin Páll Gúst­avs­son, knatt­spyrnu­lands­liðs­fyr­ir­lið­inn Aron Einar Gunn­ars­son og mennta­mála­ráð­herra, Lilja Alfreðs­dóttir.

Dreng­ur­inn hefur reglu­lega hringt grát­andi heim og ákvað móðir hans að opna á umræð­una um ein­elti eftir að hún heyrði hann lýsa því við vin sinn í síma að hann lang­aði til að deyja. 

Brosir nú hringinn

„Ólíver brosir hring­inn eftir að hafa fengið sím­töl og skila­boð frá þeim sem hann dýrkar og dáir mest í líf­inu,“ segir Sigríður Elín í Facebook-færslu í kvöld. 

„Takk Ingó Veðurguð fyrir að hringja og stappa í hann stál­inu,“ segir hún. „Takk Jón Daði og íslenska lands­liðið í fót­bolta fyrir hjart­næm skila­boð til Ólívers, hann fékk kusk í augað og trúði varla sínum eigin augum. Takk Aron Einar, Ólíver missti and­litið þegar fyr­ir­liði íslenska lands­liðs­ins sendi honum skila­boð og sagð­ist vilja heyra í honum. Takk Björgvin Páll Gúst­avs­son fyrir ein­lægt og upp­byggj­andi spjall við Ólíver, hann er mjög spenntur að hitta þig á vell­inum og spila við þig, hann ætlar sko ekki að tapa fyrir þér! Takk Aron Pálm­ars­son fyrir peppið og spjallið og ÁFRAM FH! Takk Ævar vís­inda­maður, ævin­týra­gjarna gutt­anum mínum finnst þetta frá­bær hug­mynd hjá þér. Takk ALLIR! Það er magnað að upp­lifa þetta góða, fal­lega í líf­inu eftir langa­var­andi nið­ur­brot.“

Skólastjórnendur hörmuðu stöðuna

Eftir að frá­sögnin kom fram sendu skóla­stjórn­endur í Sjá­lands­skóla frá sér yfir­lýs­ingu og sögð­ust „harma þá stöðu sem upp er komin vegna ein­elt­is­máls sem fjallað hefur verið um á opin­berum vett­vangi“. Þeir sögðu að „unnið hefði verið eftir ein­eltis­á­ætlun Garða­bæjar síðan til­kynn­ing til skól­ans barst um þetta til­tekna mál“. „Skólinn getur ekki tjáð sig um mál ein­staka nem­enda en mik­il­vægt er að það komi fram að unnið hefur verið með nem­endum skól­ans í félags­færni og vin­áttu­þjálfun um langt skeið. Meðal ann­ars hafa allir kenn­arar skól­ans sótt nám­skeið hjá KVAN þar sem kenn­arar geta sótt í verk­færakistu til að efla og þjálfa félags­leg sam­skipti. Þeirri vinnu verður haldið áfram í skól­anum í sam­vinnu við fræðslu­svið Garða­bæjar. Skólinn hefur lagt sig fram um að vinna öll ein­elt­is­mál og sam­skipta­mál sem upp koma fag­lega og af festu.“

Sigríður Elín til­tekur að þau hafi fengið sím­tal frá mennta­mála­ráð­herra, sem fer með skóla­mál í rík­is­stjórn Íslands. „Takk mennta­mála­ráð­herra Lilja Alfreðs­dóttir fyrir að hringja og sýna stuðn­ing í verki með því að ætla að taka fastar á ein­elt­is­málum í skóla­kerf­inu og finna betri lausnir sem virka fyrir börnin og ung­ling­ana okkar. Og gleymum ekki að allir þeir sem standa með Ólíver í bar­átt­unni standa með öllum öðrum börnum þarna úti sem eru að upp­lifa það sama.“