Skóla- og frístundaráð Reykjavíkurborgar hefur samþykkt að ráðast í endurbætur á gjaldskrár- og greiðslukerfum skóla- og frístundaráðs. Með endurbótavinnunni á að tryggja að öll börn á leik- og grunnskólaaldri hafi öruggt aðgengi að skóla- og frístundastarfi, óháð efnahag foreldra þeirra. Vinna á hvítbók sem verði grundvöllur að endurbótum á kerfinu.
Í ágúst síðastliðnum kom fram að forráðamenn átta barna, sem fengið höfðu boð um leikskólavist, þyrftu að greiða vanskil vegna leikskólaþjónustu eða semja um þau, svo börnin fengju inni á leikskólum borgarinnar. Þá hefðu forráðamenn sjö barna fengið ítrekun á uppsögn barnanna og hefðu frest fram að síðustu mánaðamótum til að ganga frá vanskilum, að öðrum kosti myndu börnin ekki fá notið þjónustunnar. Var staðan þessi þrátt fyrir að í gildi séu verklagsreglur frá árinu 2013 sem eiga að tryggja að börn verði ekki af nauðsynlegri grunnþjónustu vegna erfiðrar fjárhagsstöðu eða skuldavanda foreldra þeirra.
Í frétt sem birt var á síðu Reykjavíkurborgar 31. ágúst kom fram að ekkert barn hefði verið svipt leikskólaþjónustu undanfarin misseri þegar foreldrar hafa sótt um aðstoð frá velferðarsviði borgarinnar samkvæmt verklagsreglunum frá 2013. Á fyrstu 6 mánuðum 2020 hefðu foreldrar um 200 barna fengið aðstoð vegna greiðslu leikskólagjalda. Á tímabilinu janúar 2019 til ágúst 2020 hefðu 26 börn hætt í leikskóla eftir að forráðamenn þeirra fengu tilkynningu um uppsögn vegna vanskila. Tíu börn hefðu hætt þar eð þau hefðu hafið grunnskólagöngu, þrjú börn hefðu flutt frá Reykjavík en í tilfelli þrettán barna hefðu foreldrar ekki óskað eftir aðkomu velferðarsviðs eða að ástæða þess að börnin hættu var óþekkt.
Vilja fá utanaðkomandi aðila til að rýna kerfið
Skúli Helgason, formaður skóla- og frístundaráðs, segir tillöguna að endurbótunum ekki vera beint viðbragð við fregnum af umræddum fjárhagsvanda foreldra, en engu að síður verði sá þáttur einnig undir í endurskoðuninni. „Það er prinsippafstaða sem hefur ríkt sátt um í pólitíkinni að við viljum ekki að börnum sé neitað um þessa mikilvægu þjónustu á grundvelli þess að það sé hart í ári hjá foreldrum eða forráðamönnum.“
„Við viljum ekki að börnum sé neitað um þessa mikilvægu þjónustu á grundvelli þess að það sé hart í ári hjá foreldrum“
Skúli segir að með breytingu á kerfunum einfaldist vonandi viðmót sem mætir foreldrum, bæði hvað varði að sækja um og greiða fyrir leikskólavist og frístundastarf. Stefnt sé að því að fá utanaðkomandi aðila til að rýna kosti og galla núverandi gjaldskrár, meðal annars með samanburði við önnur sveitarfélög og nágrannalönd. Niðurstöðum úttektarinnar verði síðan skilað í hvítbók sem notuð verði sem grundvöllur undir endurbæturnar.
Spurður hvort til greina komi að gera leikskólavist og frístund gjaldfrjálsa þjónustu segir Skúli að ekki sé komið svo langt að horfa til slíkra breytinga. Hugmyndin sé að rýna núverandi kerfi en velta jafnframt upp leiðum sem reynst hafi vel annars staðar. „Við erum ekki að horfa til þess að gera þjónustuna gjaldfrjálsa í þessari vinnu en hér eftir sem hingað til er það metnaðarmál okkar hjá borginni að halda gjöldum eins lágum og kostur er.“
Athugasemdir