Ráðuneytið telur Þórdísi ekki hafa brotið siðareglur

Atvinnu- og nýsköp­un­ar­ráðu­neytið telur að Þórdís Kolbrún Reyk­fjörð Gylfa­dóttir ráð­herra hafi ekki brotið gegn siða­reglum ráð­herra með veru sinni í mynda­seríu á Instagram sem kostuð var af Icelandair Hotels.

Þórdís sótti vinafagnað sem fjöl­miðla­konan og áhrifa­vald­ur­inn Eva Laufey Kjaran Her­manns­dóttir stóð fyrir á sunnu­dag. Nutu Eva og þrjár vin­konur hennar fjár­hags­lega góðs af þessu sam­kvæmt sam­komu­lagi við Icelandair Hotels, en fylgj­endur Evu á Instagram eru 34 þús­und tals­ins. Myndir af þeim öllum saman ásamt ráð­herra voru birtar á sam­fé­lags­miðl­inum í mynda­seríu sem Eva hafði merkt sem sam­starf við Icelandair Hotels.

Í svörum við fyr­ir­spurn Stund­ar­innar til ráðu­neytis Þórdísar kemur fram að ráð­herra hafi greitt fullt verð fyrir sig á þessum degi. „Ráðu­neytið telur að ekki hafi verið um að ræða brot á siða­reglum.“

Í 4. grein siða­reglna ráð­herra er fjallað um hátt­semi og fram­göngu ráð­herra. „Ráðherra forð­ast allt athæfi sem lík­legt er til að vekja grun­semdir um að hann not­færi sér stöðu sína í eig­in­hags­muna­skyni.“

Þykir leitt að hafa tekið myndina

Gagnrýnt var um helg­ina að tveggja metra regl­unnar um sótt­varnir hafi ekki verið gætt í sam­sæt­inu sam­kvæmt myndum sem birt­ust á sam­fé­lags­miðlum. Þórólfur Guðnason sótt­varn­ar­læknir var spurður um athæfið á upp­lýs­inga­fundi í gær. „Ég held hún hafi ekki verið að brjóta lögin en hefði mátt passa betur upp á tveggja metra regl­una þarna,“ sagði hann.

Þá sagði Bjarni Bene­dikts­son, fjár­mála­ráð­herra og for­maður Sjálf­stæð­is­flokks­ins, að athæfi Þórdísar hafi verið óheppi­legt. Sjálf sagði hún við RÚV í gær að mynda­takan hefði verið óþarfi. „Ég skil vel hvernig þetta kom við fólk og þessi mynda­taka af okkur saman í einum hópi, þrátt fyrir að strangt til tekið skilj­ist mér að það sé ekki brot á reglum, þá var hún óþarfi og við hefðum ekki átt að taka hana, og mér þykir það leitt. Ég átta mig á því að ég er í fram­línu og þetta er risa­stórt verk­efni og okkur líður öllum alls konar,“ sagði Þórdís.

„[...] þá var hún óþarfi og við hefðum ekki átt að taka hana, og mér þykir það leitt“

Í aug­lýs­ingu heil­brigð­is­ráð­herra frá 30. júlí um tak­mörkun á sam­komum vegna far­sóttar er kveðið skýrt á um tveggja metra regl­una. Regl­urnar voru hertar vegna fjölg­unar kór­óna­veirusmita. „Á sam­komum, öllum vinnu­stöðum og í allri annarri starf­semi, m.a. þeirri sem talin er upp í 3. gr., skal tryggja að hægt sé að hafa a.m.k. 2 metra á milli ein­stak­linga sem ekki deila heim­ili.“

Í siða­reglum ráð­herra er kveðið á um hátt­semi og fram­göngu ráð­herra í 4. grein: „Ráðherra gætir þess að rýra ekki virð­ingu emb­ættis síns með ámæl­is­verðri fram­komu, skeyt­ing­ar­leysi um lög eða virð­ing­ar­leysi við mann­gildi og mann­rétt­indi.“