Birtingur útgáfufélag tapaði 236 milljónum króna á síðasta ári. Þetta kemur fram í ársreikningi þess. Félagið gefur út blöðin Gestgjafann, Hús og híbýli, Vikuna og Mannlíf, auk þess að reka vefinn Mannlif.is.

Tap Birtings nam 168 milljónum króna árið 2018 og 92 milljónum árið 2017. Hefur tapið því aukist nokkuð á milli ára. Mestu virðist muna um að rekstartekjur félagsins hafi dregist saman um 56 milljónir króna á milli ára.

Halldór KristmannssonHalldór eignaðist félagið til fulls árið 2018.

Hlutafé félagsins var aukið um 227 milljónir króna árið 2019 og um samtals 308 milljónir króna rekstarárin tvö þar á undan til að fjármagna taprekstur áranna. Þannig hefur hlutafé félagsins verið aukið um 535 milljónir, rúmlega hálfan milljarð króna, á þriggja ára tímabili.

Eigandi Birtings var fjárfestingafélagið Dalurinn ehf., sem er alfarið í eigu Halldórs Kristmannssonar, framkvæmdastjóra hjá Alvogen, sem hefur séð um samskipti við fjölmiðla fyrir Róbert Wessmann, forstjóra Alvogen. Ársreikningur Dalsins hefur ekki verið birtur opinberlega og því ekki hægt að sjá með hvaða hætti hlutafjáraukning Birtings var fjármögnuð. 

Í apríl 2018 seldu Róbert, Árni Harðarson, aðstoðarforstjóri Alvogen, og Jóhann G. Jóhannsson, sem einnig starfar hjá lyfjafyrirtækinu, hluti sína til Halldórs. Samstarfsmennirnir keyptu Birting sumarið 2017 eftir að fyrirhuguð kaup Björns Inga Hrafnssonar og fjölmiðlasamsteypunnar Pressunnar á útgáfufélaginu urðu að engu. 

Fyrr í sumar samdi Sigríður Dagný Sigurbjörnsdóttir, sem hefur starfað sem framkvæmdastjóri Birtings frá árinu 2017, um kaup á öllu hlutafé í fyrirtækinu. Samhliða hlutabréfakaupunum var gerður samstarfssamningur sem kvað á um að vefsvæðið yrði áfram í umsjón og eigu Halldórs Kristmannssonar, sem myndi greiða sérstaklega fyrir notkun á efni Birtings, vinnslu fréttaefnis, rekstur og þróun vefsvæðis.