Katrín Jakobsdóttir forsætisráðherra segir að Lilja Dögg Alfreðsdóttir, mennta- og menningarmálaráðherra, þurfi að gera grein fyrir sjónarmiðum sínum eftir að kærunefnd jafnréttismála komst að þeirri niðurstöðu að hún hefði brotið jafnréttislög við skipan Páls Magnússonar, flokksbróður síns úr Framsóknarflokknum, í embætti ráðuneytisstjóra.
RÚV greindi frá úrskurðinum í dag, en í honum kemur fram að hæfisnefnd hafi vanmetið konuna sem kærði ráðninguna. Fjórir voru metnir hæfastir, tvær konur og tveir karlar, Páll þar á meðal. Konan sem kærði ráðninguna, Hafdís Helga Ólafsdóttir, var ekki í þeim hópi.
Páll hefur lengi verið virkur í starfi Framsóknarflokksins, flokknum sem Lilja er þingmaður fyrir og varaformaður í. Á árunum 1990-1998 var hann varabæjarfulltrúi í Kópavogi og varaþingmaður frá 1999 til 2007. Hann var aðstoðarmaður iðnaðar- og viðskiptaráðherra, fyrst Finns Ingólfssonar og síðar Valgerðar Sverrisdóttur, um sjö ára skeið. Árið 2009 laut hann í lægra haldi fyrir Sigmundi Davíð Gunnlaugssyni í formannskosningu í flokknum. Loks var bróðir hans, Árni Magnússon, félagsmálaráðherra fyrir Framsóknarflokkinn.
„Að auki hafi verulega skort á efnislegan rökstuðning menntamálaráðherra fyrir ráðningunni“
Áslaug Árnadóttir lögmaður gætti hagsmuna Hafdísar í málinu. „Í úrskurðinum kemur fram að annmarkar hafi verið á málsmeðferð og ákvarðanatöku ráðuneytisins við mat og val á umsækjendum um stöðuna,“ segir í færslu um málið á vef lögmannsstofu hennar, Landslaga. „Þannig hafi menntun, reynsla af opinberri stjórnsýslu, leiðtogahæfileikar og hæfni kærandans til að tjá sig í riti verið vanmetin samanborið við þann sem ráðinn var í stöðuna. Að auki hafi verulega skort á efnislegan rökstuðning menntamálaráðherra fyrir ráðningunni og ljóst sé að karl sem skipaður var í stöðuna hafi ekki staðið kærandanum framar við ráðninguna. Þar af leiðandi hafi ekki tekist að sýna fram á að aðrar ástæður en kynferði hafi legið til grundvallar ráðningunni og því hafi ráðherrann brotið gegn jafnréttislögum.“
Niðurstaða kærunefndar jafnréttismála var sú að „ýmissa annmarka hefði gætt við mat“ á hæfni konunnar varðandi þætti sem voru settir fram sem fortakslaus skilyrði í starfsauglýsingu. Að því virtu væru nægilegar líkur á að henni hefði verið mismunað að á grundvelli kyns. Ráðherra hefði mistekist að sýna fram á að aðrar ástæður en kyn hefðu legið til grundvallar ákvörðun hans. Því hefði Lilja brotið jafnréttislög.
„Hæstvirtur menntamálaráðherra þarf að gera grein fyrir sínum sjónarmiðum í þessu máli“
Hanna Katrín Friðriksson, þingmaður Viðreisnar vakti máls á úrskurðinum undir liðnum óundirbúnar fyrirspurnir á Alþingi í dag. Gagnrýndi hún þann fjölda mála þar sem jafnréttislög hafa verið brotin og sagði kostnaðinn við bætur koma úr vasa skattgreiðenda. Katrín Jakobsdóttir forsætisráðherra svaraði því að Lilja hefði kynnt úrskurðinn fyrir ríkisstjórninni í morgun og að málið yrði tekið til skoðunar. „Hæstvirtur menntamálaráðherra þarf að gera grein fyrir sínum sjónarmiðum í þessu máli,“ sagði hún.
Athugasemdir