Anna Lísa Björnsdóttir, starfsmaður á skrifstofu Vinstri grænna og fyrrverandi kosningastjóri, er ein þeirra sem valin hefur verið í vinnuhóp á vegum þjóðaröryggisráðs til að sporna gegn upplýsingaóreiðu vegna Covid-19. Anna Lísa sinnir samskiptum og viðburðum fyrir Vinstri græn.
Tilkynnt var um vinnuhópinn í gær, en honum er falið að „kortleggja birtingarmyndir og umfang upplýsingaóreiðu í tengslum við COVID-19 hér á landi og gera tillögur um aðgerðir til þess að sporna gegn henni“. Í tilkynningu frá forsætisráðuneytinu kemur fram að íslensk stjórnvöld séu nú í samstarfi við önnur EES-ríki um að sporna gegn upplýsingaóreiðu og rangfærslum í tengslum við faraldurinn. „Sjaldan hefur verið mikilvægara að almenningur hafi aðgang að réttum upplýsingum eins og nú í tengslum við þennan heimsfaraldur sem nú geisar.“
Vinnuhópinn skipa Elfa Ýr Gylfadóttir, framkvæmdastjóri fjölmiðlanefndar, Kjartan Hreinn Njálsson frá Landlæknisembættinu, Jón Gunnar Ólafsson, doktor í fjölmiðlafræði, Anna Lísa Björnsdóttir, samskiptamiðlafræðingur, Guðrún Hálfdánardóttir, blaðamaður, María Mjöll Jónsdóttir frá utanríkisráðuneytinu, Sigurður Emil Pálsson frá samgöngu- og sveitastjórnarráðuneytinu, Þorgeir Ólafsson frá mennta- og menningarmálaráðuneytinu og Þórunn J . Hafstein, ritari þjóðaröryggisráðs, sem leiðir starf hópsins.
Anna Lísa hefur verið félagi í Vinstrihreyfingunni - grænu framboði frá stofnun flokksins og var kosningastjóri hans í Reykjavík vorið 2018. Hún sinnir samskiptum og viðburðum í starfi sínu á skrifstofu VG og stýrir einnig VG-varpinu, hlaðvarpsþætti Vinstri grænna. Í tilkynningunni frá forsætisráðuneytinu er hún titluð samskiptamiðlafræðingur.
Ekki eru greidd laun fyrir setu í vinnuhópnum, að því fram kemur í svari forsætisráðuneytisins við fyrirspurn Stundarinnar. „Leitað var til einstaklinga sem hafa innsýn og þekkingu á sviði fjölmiðlunar, samskiptamiðla og heilbrigðismála í tengslum við COVID-19 auk tengiliða hjá þeim ráðuneytum sem fara með málefni á sviði fjölmiðlunar, netöryggis og alþjóðasamskipta,“ segir í svarinu.
Samkvæmt lögum um þjóðaröryggisráð skal það „í samvinnu við háskólasamfélagið, hugveitur og fjölmiðla beita sér fyrir opinni og lýðræðislegri umræðu um þjóðaröryggismál og eflingu fræðslu og upplýsingagjöf um þau mál“. Heilbrigðisöryggi og farsóttir eru hluti af þjóðaröryggisstefnu samkvæmt þingsályktun þess efnis sem samþykkt var 2016.
Í þjóðaröryggisráði sjálfu sitja Katrín Jakobsdóttir forsætisráðherra og formaður VG, sem er formaður ráðsins, utanríkisráðherra, dómsmálaráðherra og ráðuneytisstjórar viðkomandi ráðuneyta. Tveir alþingisþingmenn, einn úr meirihluta Alþingis og einn úr minnihluta, sitja einnig í ráðinu, sem og forstjóri Landhelgisgæslunnar, ríkislögreglustjóri og fulltrúi Slysavarnafélagsins Landsbjargar.
„Hvað í ósköpunum ætla menn að gera ef finnst t.d. röng frétt um Covid einhvers staðar?“
Sigríður Á. Andersen, þingmaður Sjálfstæðisflokks og fyrrverandi dómsmálaráðherra, gagnrýndi skipan vinnuhópsins á Facebook síðu sinni í gær.
„Nú átta ég mig ekki á að hverju eða hverjum þessi vinna átta manna á að beinast,“ skrifaði Sigríður. „Varla að þríeykinu svokallaða sem hefur nánasta einokað umræðuna hér á landi um Covid19? Það væri hins vegar forvitnilegt að vita fyrirfram hverju þessu vinna á að skila. Hvað í ósköpunum ætla menn að gera ef finnst t.d. röng frétt um Covid einhvers staðar? Hvað?“
Covid-19
Fleiri smitast af hinni banvænu Nipah-veiru
Heilbrigðisyfirvöld grípa til sóttkvíar eftir Nipah-smittilfelli á Indlandi
Veira dreifist hratt um Evrópu
Sérfræðingar vara við nýjum heimsfaraldri
Suður-Súdan glímir við versta kólerufaraldurinn í 20 ár
Athugasemdir