„Það er enginn við fossinn,“ segir starfsmaður á Gullfosskaffi. Þegar rætt var við starfsmanninn um kaffileytið í dag, á sunnudegi, var ekki neinn ferðamaður á svæðinu.

„Það er enginn möguleiki á að neinn sé hérna. Það eru bara bílar starfsmanna á bílastæðinu.“

Ísland er smám saman að tæmast af ferðamönnum. Frá árinu 2017 hafa ekki verið færri en tvær milljónir ferðamanna á ári á Íslandi, eða sem nemur hátt í sex ferðamenn á hvern Íslending. Það er með hæsta hlutfalli ferðamanna af íbúafjölda í heiminum öllum.

Um helgina voru hins vegar fáir ferðamenn á ferli á helstu náttúruperlum. Á löngum tímabilum var enginn ferðamaður við Gullfoss. Á Geysissvæðinu mátti sjá um fimm til tíu manns hverju sinni.

„Nú er góður tími til að njóta þess sem þetta er: Náttúra.“

Strokkur um helginaNokkrir ferðamenn voru á svæðinu.

Enginn við GullfossMynd tekin í gær sýnir tómt útsýnissvæði þar sem áður komu jafnvel þúsundir á degi hverjum.

Samkvæmt svörum frá Gullfosskaffi hefur fækkað smátt og smátt eftir því sem ferðabönn hafa verið kynnt. „Kannski hafa komið um tuttugu á dag um helgina. Vanalega hafa verið á bilinu eitt til tvö þúsund manns hérna á hverjum degi. Núna er þetta mikið íslenskt fjölskyldufólk og einstaka ferðamenn á bílaleigubílum. Það koma engar rútur lengur,“ segir starfsmaður.

Hann segir að það sé ljós í myrkrinu, ekki síst fyrir Íslendinga sem vilja sjá landið sitt.

„Nú er góður tími til að njóta þess sem þetta er: Náttúra. Það er ekkert fólk hérna núna.“