Ein­býl­is­hús sem Björn Ingi Hrafns­son, rit­stjóri vef­síð­unnar Viljans og fyrr­ver­andi eig­andi fjöl­miðl­anna Pressunnar og DV, keypti og greiddi fyrir meðal ann­ars með aug­lýs­inga­samn­ingi hjá miðlum sínum er ekki lengur í hans eigu. Björn Ingi fékk einnig kúlu­lán hjá sjóð­stýr­ing­ar­fyr­ir­tæk­inu GAMMA til að fjár­magna kaupin. Umrætt ein­býl­is­hús komst í eigu félags sem fyrr­ver­andi starfs­maður GAMMA á en hefur nú verið selt aftur. Björn Ingi hefur siglt mik­inn öldu­sjó síð­ustu miss­eri en eftir að hafa flogið hátt í við­skipta­líf­inu hefur hann þurft að sæta því að missa eignir sínar á nauð­ung­ar­upp­boðum, auk þess sem gerð hafa verið hjá honum árang­urs­laus fjár­nám.

Umrætt ein­býl­is­hús, sem er 238 fer­metrar og stendur við Kirkju­stétt í Reykja­vík, keypti Björn Ingi með næsta fáheyrðum hætti um mitt ár 2016 af Guðmundi Gauta Reyn­is­syni, einum helsta eig­anda Hús­gagna­hall­ar­innar. Kaupin voru fáheyrð að því marki að Björn Ingi greiddi Guðmundi Gauta hluta kaup­verðs­ins með 24 millj­óna króna aug­lýs­inga­inn­eign hjá fjöl­miðlum sínum, eins og greint var frá í Stund­inni í des­em­ber árið 2017. Ætla má að sú aug­lýs­inga­inn­eign hafi átt að nýt­ast Hús­gagna­höll­inni, Dorma, Betra baki eða öðrum fyr­ir­tækjum sem Guð­mundur Gauti átti eða tengd­ist. Ekki náð­ist í Guðmund Gauta til að spyrj­ast fyrir um hvort hann hefði nýtt sér aug­lýs­inga­inn­eign­ina alla.

Fjármagnað með tveimur kúlulánum frá GAMMA

Björn Ingi fékk einnig tvö kúlu­lán frá sjóð­stýr­ing­ar­fyr­ir­tæk­inu GAMMA til að fjár­magna kaupin. Lánin, að upp­hæð 13 og 22 millj­ónir króna, fékk Björn Ingi frá sjóðnum GAMMA: Credit Opp­urtunity Fund. Lánin sem um ræðir voru veitt til fjög­urra og hálfs mán­aðar og skyldu þau upp­greidd 30. des­em­ber árið 2016. Ári síðar, 8. des­em­ber 2017, voru lánin hins vegar enn á veð­banda­yf­ir­liti húss­ins að Kirkju­stétt. Heild­ar­kaup­verð húss­ins var 97 millj­ónir króna.

Björn Ingi seldi hins vegar félag­inu AH Verk­tökum ehf. húsið árið 2018, sam­kvæmt afsali dag­settu 12. febr­úar það ár. Samkvæmt afsal­inu var þá búið að aflétta lán­unum af veð­banda­yf­ir­liti húss­ins. Kaup­samn­ingur vegna þeirra við­skipta er hins vegar ekki aðgengi­legur og því ekki hægt að full­yrða um hvernig þau við­skipti fóru fram eða hvað AH Verk­takar greiddu fyrir húsið.

Kaupverð fæst ekki uppgefið

AH Verk­takar er í eigu þeirra Arnars Hauks­sonar og föður hans, Hauks Hall­dórs­sonar. Arnar er fyrr­ver­andi starfs­maður GAMMA og bróðir Gísla Hauks­sonar, stofn­anda GAMMA og for­stjóra þess allt þar til í mars árið 2018. Stundin hafði sam­band við Arnar og spurð­ist fyrir um hvernig það hefði komið til að félag hans hefði eign­ast húsið að Kirkju­stétt. Arnar svar­aði því til að hann hefði frétt af því að Björn Ingi vildi selja húsið og það hefði verið keypt í gegnum félagið AH Verktaka. Spurður hvert kaup­verðið á hús­inu var vildi Arnar engu svara um það og sagði það trún­að­ar­mál. Sem fyrr segir var kaup­verð húss­ins 97 millj­ónir króna þegar Björn Ingi keypti það. Arnar sagði jafn­framt að kaup félags hans á hús­inu að Kirkju­stétt tengd­ust á engan hátt lán­veit­ingum GAMMA til Björns Inga.

AH Verk­takar seldu svo húsið til hjón­anna Þorláks Morthens, Tolla, og Guðrúnar Magn­ús­dóttur og er afsal þess efnis frá 8. jan­úar síð­ast­liðnum. Kaup­samn­ingur er ekki aðgengi­legur og því ekki opin­bert hvert kaup­verð húss­ins var í þeim við­skiptum. Arnar Hauksson vildi heldur ekki tjá sig um það þegar Stundin leit­aði eftir því.

Gjaldþrot og nauðungaruppboð

Stundin hefur áður fjallað um við­skipti og fjár­hags­vand­ræði Björns Inga Hrafns­sonar. Eftir að fjöl­miðla­fyr­ir­tæki hans, Pressan og DV, urðu gjald­þrota hóf skatt­rann­sókn­ar­stjóri rann­sókn vegna gruns um meiri háttar skatta­laga­brot. Rann­sóknin tengd­ist milli­færslum frá fyr­ir­tækj­unum yfir á hans eigin reikn­inga en þeirri rann­sókn lauk í febr­úar á síð­asta ári án þess að ástæða væri talin til að aðhaf­ast í mál­inu.

Í jan­úar síð­ast­liðnum voru fjórar eignir Björns Inga að Más­stöðum í Hval­fjarð­ar­sveit boðnar upp að beiðni rík­is­skatt­stjóra, Hval­fjarð­ar­sveitar, Vátrygg­inga­fé­lags Íslands, sýslu­manns­ins á Vest­ur­landi, Lands­bank­ans og Íslands­banka. For­eldrar Björns Inga búa á Más­stöðum og seldu syni sínum eign­irnar. Í febr­úar voru svo tvær sum­ar­bú­staða­jarðir í eigu félags Björns Inga, Kringlut­urns­ins ehf., sem hann á með við­skipta­fé­laga sínum, Arnari Ægissyni, boðnar upp að kröfu Grímsnes- og Grafn­ings­hrepps. Aðra jörð­ina keypti Ferða­húsið ehf. á 220 þús­und krónur en upp­boð á hinni jörð­inni var aft­ur­kallað.

Þá féll dómur í Hér­aðs­dómi Vest­ur­lands 19. febr­úar síð­ast­lið­inn þar sem Birni Inga var gert að greiða þrota­búi Pressunnar ehf. 80 millj­ónir króna. Dómurinn féllst á að veð­setn­ingu á eignum félags­ins, sem gerð var með láns­samn­ingi milli Pressunnar og Björns Inga, yrði rift. Í dómnum segir að ekk­ert hafi komið fram um að Björn Ingi hafi í raun og sann lánað Press­unni umrædda fjár­muni.