Vigdís Hauksdóttir hefur sent Vinnueftirlitinu kvörtun vegna þess sem hún segir að sé einelti og áreiti í sinn garð af hálfu Helgu Bjargar Ragnarsdóttur, skrifstofustjóra borgarstjóra og borgarritara. Ástæðan fyrir kvörtun Vigdísar nú er sú að Helga Björg hefur setið síðustu tvo fundi borgarráðs og er það Vigdísi til ama sökum forsögu þeirra tveggja. Hefur Vigdís að eigin sögn óskað eftir því að Helga Björg sitji ekki umrædda fundi en við því hefur ekki verið orðið.
Á sér langa forsögu
Forsaga málsins er sú að í júlí 2017 var Reykjavíkurborg gert að greiða starfsmanni ráðhúss Reykjavíkur, undirmanni Helgu Bjargar, skaðabætur vegna slæmrar framkomu Helgu Bjargar í hans garð. Þá var skrifleg áminning sem starfsmanninum hafði verið veitt ógilt. Í dómsorði sagði dómari meðal annars eftirfarandi: „Um þá skilyrðislausu hlýðni sem skrifstofustjórinn virðist ætla af stefnanda verður sagt það eitt að þrátt fyrir stjórnunarrétt annars og hlýðniskyldu hins eru undirmenn ekki dýr í hringleikahúsi yfirmanna sinna.“
Frá því að umræddur dómur var kveðinn upp hefur verið afar grunnt á því góða í ráðhúsinu. Það má ekki síst rekja til þess að Vigdís tjáði sig um dóminn á opinberum vettvangi. Hlaut hún meðal annars bágt fyrir hjá Stefáni Eiríkssyni, þáverandi borgarritara, sem mun hafa sent Vigdísi tölvupóst 10. ágúst 2017 þar sem hann gagnrýndi framgöngu hennar. Taldi Vigdís að með bréfaskrifunum hefði Stefán haft í hótunum við hana.
Um mitt ár í fyrra hóf eineltis- og áreitnisteymi ráðhúss Reykjavíkur að rannsaka kvartanir Helgu Bjargar vegna framgöngu Vigdísar í sinn garð. Meðal annars var Vigdísi þá sent í ábyrgðarpósti um 100 blaðsíðna erindi þess vegna. Í desember síðastliðnum vísaði teymið ásökunum Helgu Bjargar til siðanefndar Sambands íslenskra sveitarfélaga og er málið þar til meðferðar.
Segir Helgu Björg hafa reynt að sverta mannorð sitt
Vigdís birtir erindi sitt til Vinnueftirlitsins á Facebook-síðu sinni og segir að hún sé knúin til að leggja fram formlega kvörtun vegna Helgu Bjargar. Hún sé kjörinn fulltrúi og beri sem slíkri að sitja fundi í ráðum sem hún sé kjörin í. „Forsaga þessa máls er að ég las upp úr héraðsdómi í borgarstjórn þar sem segir í dómsorði að yfirmenn mega ekki koma fram við undirmenn sína eins og dýr í hringleikahúsi. Síðan þá hefur þessi aðili ráðist að mér í fjölmiðlum og reynt að sverta mannorð mitt. Hún ber mig þungum sökum og sakar mig um einelti þrátt fyrir að hafa einungis hitt mig tvisvar eða þrisvar þegar hún setti málið af stað.“
„Hér er búið að snúa málum við og tel ég að þetta áreiti og ögrun gagnvart mér sé einelti í minn garð“
Vigdís segir að í þessu ljósi og í ljósi þess að mál á hendur henni sé nú til meðferðar hjá siðanefnd Sambands íslenskra sveitarfélaga telji hún óásættanlegt fyrir sig að Helga Björg sé farin að mæta á fundi borgarráðs.
„Hvernig má það vera að hún sækist í að sitja sömu fundi og ég sem er meintur „gerandi og ofbeldismaður“ í málinu.“
Segir Vigdís að hún hafi óskað eftir því að Helga Björg víki af fundunum en ekki hafi verið við því orðið. Allir embættismenn borgarinnar séu með staðgengla og samkvæmt öllum eineltisfræðum ætti Helga Björg að forðast að vera í návist hennar.
„Hér er búið að snúa málum við og tel ég að þetta áreiti og ögrun gagnvart mér sé einelti í minn garð.
Ég óska eftir aðstoð Vinnueftirlitsins í þessu sérstæða máli.“
Athugasemdir