Heildarlaun verkamanns sem hefur störf við sorphirðu hjá Reykjavíkurborg eru 476.241 krónur á mánuði, að meðtöldum yfirvinnugreiðslum og öðrum greiðslum, til dæmis bónusgreiðslum fyrir að nýta ekki veikindarétt.

Halldór Benjamín Þorbergsson, framkvæmdastjóri Samtaka atvinnulífsins, tilgreindi í Kastljósi Ríkisútvarpsins í fyrrakvöld að laun sorphirðufólks myndu hækka úr 630 þúsund krónum á mánuði í 850 þúsund króna mánaðarlaun ef kröfur Eflingar yrðu samþykktar, en þær ganga út á hækkun lægstu taxtalauna umfram lífskjarasamningana.

Sorphirðufólk hækki einnig

Halldór Benjamín mætti Sólveigu Önnu Jónsdóttur, formanni Eflingar, í Kastljósinu í fyrrakvöld þar sem kjaramálin voru til umræðu, einkum hinn svonefndi lífskjarasamningur en Halldór hélt því fram að Efling hefði lagt til atlögu við hann. 

Halldór Benjamín sagði að Sólveig Anna og hennar félagar kysu að tala eingöngu um kvennastéttir á lágum launum, svo sem starfsfólk leikskóla, en minntist ekki á aðra hópa sem einnig væru í verkfalli þessa dagana. „Sem dæmi, karlastéttin sorphirða eru þarna undir. Og ef þessar kröfur Eflingar ná fram að ganga munu heildarlaun sorphirðufólks fara rétt úr 630 þúsund í 850 þúsund. En Efling kýs að tala ekkert um þetta.“

613 þúsund í meðalheildarlaun

Halldór Benjamín segist í samtali við Stundina hafa mismælt sig í viðtalinu og að launin væru í raun 613 þúsund að meðaltali hjá sorphirðumönnum Reykjavíkurborgar.

„Ég hafði samband við mannauðssvið Reykjavíkurborgar og bað um útreikninga á kröfum Eflingar vegna starfsmanna í sorphirðu, nánar tiltekið meðalheildarlaun í dag og í lok fyrirhugaðs samningstíma. Til svara var Lóa Birna Birgisdóttir, sviðsstjóri mannauðs- og starfsumhverfissviðs. Þær tölur sem hún lét mér í té voru 613 þúsund krónur meðalheildarlaun hjá sorphirðufólki en ef gengið yrði að kröfu Eflingar þá yrðu meðalheildarlaun 850 þúsund krónur í lok samningstímans. Ég mismælti mig í Kastljósi og sagði 630 en átti auðvitað að vera 613 og hækkun í 850 í heildarlaun á mánuði,“ segir Halldór.

Heildarlaun eftir 12 ára vinnu 514 þúsund krónur

Sé horft á kauptaxta verkamanna við sorphirðu samkvæmt kjarasamningum Eflingar við Reykjavíkurborg kemur í ljós að grunnlaun þess sem hefur störf við sorphirðu eru 300.025 krónur á mánuði. Við þau laun bætist yfirvinna sem nemur 9 klukkustundum á viku, og er hún tilgreind í sérstökum kaupaukasamningi milli Eflingar og borgarinnar. Er þar tiltekið að yfirvinna greiðist vegna vinnu að morgni fyrir venjulegt dagvinnutímabil og einnig fyrir vinnu í matar- og kaffitímum. Umrædd laun fyrir yfirvinnu nema 121.505 krónum á mánuði. 

Þá fá allir þeir sem starfa við sorphirðu fyrir borgina greidda kaupauka fyrir hvern dag sem þeir mæta til vinnu. Sá kaupauki er ekki greiddur við veikindi eða þegar um aðrar fjarvistir er að ræða. Kaupaukinn nemur 2.524,72 krónum og má því reikna með að heildar kaupauki á mánuði nemi 54.711 krónum, séu ekki um neinar fjarvistir að ræða.

Því eru heildarlaun sorphirðumanns sem hefur störf hjá borginni 476.241 krónur á mánuði. Grunnlaun verkamanns sem hefur tólf ára starfsreynslu við sorphirðu eru 327.027 krónur og heildarlaun með yfirvinnu og kaupauka nema 514.178 krónum á mánuði. Þá eru grunnlaun þess sem hefur störf sem flokksstjóri við sorphirðu hjá Reykjavíkurborg 355.705 krónur. Sá fær greiddar 15 yfirvinnustundir á viku og nema yfirvinnugreiðslur því 240.091 krónu. Heildarlaun flokksstjóra, með kaupauka eru því 650.508 krónur á mánuði.

Greiðslur úr pottum ekki í hendi

Við lok árs eru veikindafjarvistir teknar saman og þeim starfsmönnum sem eru í fullu starfi 1.desember hvert ár greitt úr potti sökum þess að starfsmenn taka á sig óbættar veikindafjarvistir. Hið sama á við ef starfsmannaskortur hefur verið á einhverjum tíma á árinu, þá er starfsmönnum greitt úr potti samkvæmt ákveðinni reiknireglu. Þessar greiðslur eru hins vegar tilfallandi, hafi til að mynda ekki verið starfsmannaskortur við sorphirðu á árinu koma ekki til greiðslur. Þessar greiðslur eru inntar af hendi einu sinni á ári, 1. febrúar, og eru því ekki regluleg laun og þá er það ekki heldur á hendi starfsmanna hversu háar þær eru, eins og rakið er hér að framan.

Starfsfólk sorphirðu Reykjavíkurborgar er rétt um 50 talsins, um 40 verkamenn og um 10 flokksstjórar. Hins vegar eru ófaglærðir starfsmenn leikskóla ríflega 1.000 talsins. Þá er rétt að halda því til haga að sá stóri hópur hefur ekki færi á því að vinna yfirvinnu til að hækka heildarlaun sín, þar eð yfirvinna er ekki í boði á leikskólum nema í algjörum undartekningartilvikum.

Þar með innifelur talan yfir 613 þúsund króna meðalheildarlaun sorphirðufólks ýmsar greiðslur, til dæmis fyrir yfirvinnu og fyrir að nýta ekki veikindarétt, auk þess sem talan tekur einnig til flokksstjóra.

Ótímabundið verkfall hefst á mánudag, eftir að 95,5% félagsmanna Eflingar samþykktu það, og hefur Reykjavíkurborg sent frá sér viðvaranir vegna þess. „Á meðan verkfall Eflingar stendur yfir óska borgaryfirvöld eftir því að íbúar fari varlega þegar þeir eru á ferð um borgina, gangi vel um grenndargáma og ruslastampa og hafi gát á sér og sínum,“ segir í tilkynningu borgarinnar.