Eldsneyti lak úr flugvél Icelandair, sem brotlenti á Keflavíkurflugvelli í síðustu viku. Þetta staðfestir Ragnar Guðmundsson, sem stjórnar rannsókninni fyrir hönd Rannsóknarnefndar samgönguslysa. Óvíst er hvort lekinn varð áður en vélin brotlenti eða eftir lendinguna. Ragnar segir að rannsókn muni leiða það í ljós og segist ekki geta sagt til um hvort eld- eða sprengihætta hafi skapast.
Vélin sem er af gerðinni Boeing 757 brotlenti á Keflavíkurflugvelli um miðjan dag miðvikudaginn í síðustu viku þegar hjólabúnaður hennar hægra megin gaf sig í lendingu. Vélin var að koma frá Berlín og um borð voru 160 farþegar og sex manna áhöfn. Rauðu hættustigi var lýst yfir á flugvellinum og engin slys urðu á fólki. Í kjölfarið sendi Icelandair frá sér yfirlýsingu þar sem sagði að um brotlendingu hefði verið að ræða, en Ragnar sagði í samtali við Vísi í gær að brotlendingin hefði nú verið skilgreind sem flugslys.
„Ég get ekki staðfest hvenær eldsneytislekinn hófst“
„Ég get ekki staðfest hvenær eldsneytislekinn hófst. Við erum ekki komin það langt í rannsókninni, en við vonumst til að rannsókn á flugritanum leiði það í ljós,“ segir Ragnar. Flugritinn verður sendur til bresku flugslysanefndarinnar á næstu dögum, þar verða gögn úr honum greind í næstu viku og Ragnar segir að meðal þeirra séu upplýsingar um hvenær og við hvaða aðstæður eldsneytislekinn hófst.
Fram hefur komið að hjólabúnaður vélarinnar hafi verið nýlega yfirfarinn. Ragnar segir að hann hafi ekki verið nýr, heldur hafi verið um svokallaðan yfirhalaðan búnað að ræða. Hann hafi verið tekinn allur í sundur og yfirfarinn.
Er flugvélin ónýt? „Það á eftir að koma í ljós. Það er flugrekandans að ákveða það,“ svarar Ragnar.
Var fólk í hættu? Var sprengihætta eða hefði eldur getað komið upp?
„Ég er ekki tilbúinn til að tjá mig um það á meðan málið er enn í rannsókn. Ég er ekki að segja að svo hafi ekki verið, en við erum að afla gagna sem við eigum eftir að greina og erum ekki komin á þann stað í rannsókninni að það sé hægt að svara þessari spurningu.“
Athugasemdir