Álag á bráðamóttöku Landspítalans í Fossvogi er komið langt yfir þolmörk og dvalardagar sjúklinga við deildina hafa margfaldast á undanförnum árum. Á þetta bendir Reynir Arngrímsson, formaður Læknafélags Íslands, í grein í Morgunblaðinu í dag.

Læknafélagið hefur varað sóttvarnalækni, Vinnueftirlit ríkisins, Slökkvilið höfuðborgarsvæðisins, Persónuvernd og Embætti landlæknis við stöðunni, með tilliti til öryggis sjúklinga og starfsmanna, persónuverndar, sóttvarna og eldvarna. „Álag á Landspítalann er komið yfir þolmörk eins og heyra má af lýsingum starfsfólks og starfsemistölur staðfesta,“ skrifar Reynir. Þær sýna stigvaxandi fjölda bráðveikra sjúklinga sem þurfa innlögn á sjúkrahús.“

Reynir Arngrímsson

Bendir hann á að fjöldi dvalardaga þeirra sjúklinga sem dveljast lengur en tvo daga á deildinni hafi margfaldast undanfarin ár og orðið sögulega hár undir lok nýliðins árs. Þannig voru í nóvember 2017 aðeins 100 sjúklingar sem dvöldu tvo daga eða lengur á deildinni. Í nóvember 2018 voru þeir 193 og í nóvember 2019 voru 250 sjúklingar sem dvöldu lengur en í tvo daga. Að sama skapi hefur fjölgað þeim sjúklingum sem dvelja enn lengur á deildinni, það er í þrjá eða fleiri daga.

„Styttra og styttra er milli álagstoppa og þeir vara lengur og lengur,“ skrifar Reynir. „Ef horft er til þróunar samfélagsins, aldurs og heilsufars borgaranna er ekkert sem bendir til að aðstreymi sjúklinga sem þurfa bráðainnlögn á meðferðardeild fari minnkandi. “

Reynir leggur til að heilbrigðisyfirvöld reyni að minnka aðflæði á Landspítala með því að veita heilbrigðisþjónustu víðar en á Landspítalanum. „Einn af hverjum 20 hjúkrunarfræðingum hverfur ótímabært úr starfi,“ skrifar hann. „Starfsaðstæður skipta þar miklu máli. Með því að færa hluta læknisþjónustu frá Landspítala til annarra veitenda heilbrigðisþjónustu myndi skapast nýr starfsvettvangur með öðrum starfsaðstæðum sem mögulega gæti snúið þeirri þróun við.“