Mohammed bin Salman krónprins Sádi-Arabíu kynnti í upphafi árs gríðarlega stórtækar áætlanir ríkisins um uppbyggingu borgar sem á að liggja í 170 kílómetra beinni línu á Rauðahafsströnd ríkisins, í norðri, nærri landamærunum að Jórdaníu. Verkefnið gengur undir vinnuheitinu Línan.
Þar eiga ekki að vera neinir vegir á yfirborðinu og þeir milljón íbúar sem sagðir eru eiga að geta búið í borginni í fyllingu tímans eiga ekki að þurfa að ganga lengur en 5 mínútur eftir allri nauðsynlegri þjónustu, í hverfisklösum sem verða byggðir í beinni línu frá ströndinni og lengst inn í eyðimörkina. Borgin á að verða algjörlega kolefnishlutlaus.
Þetta hljómar ótrúlega. Og sennilega er það tilfellið. Krónprisinn fullyrðir að hægt verði að ferðast úr einum enda borgarinnar í annan á einungis 20 mínútum.
[adspot]
Sádar virðast þannig sjá fyrir sér að ferðast verði með Hyperloop-ofurhraðlestum í lofttæmdum göngum undir yfirborðinu á mörghundruð kílómetra hraða á klukkustund. Sú tækni er ekki enn fullgerð, en hefur verið á teikniborðinu árum saman.
Undir yfirborðinu á einnig að verða „ósýnilegt lag innviða“ þar sem vöruflutningar fyrir borgarana munu fara fram.
Bin Salman segir í háfleygu kynningarmyndbandi að verkefnið sé hugsað til þess að takast á við vandann sem fylgi mengun og umferðarslysum og til þess að koma í veg fyrir að fólk þurfi að verja klukkustundum á dag í að koma sér til og frá vinnu. Allt sem fólk þurfi verði innan seilingar.
„Af hverju ættum við að fórna náttúrunni í nafni þróunar? Hví skyldu 7 milljón manns deyja árlega vegna mengunar? Hví ættum við að missa milljón manns árlega vegna umferðarslysa?“ segir krónprinsinn meðal annars í myndbandinu.
Skýjaborg
Kynningin á Línunni hefur fengið af blendin viðbrögð og margir telja að þetta verkefni muni einungis verða til í skýrslum vel launaðra ráðgjafa krónprinsins. Bin Salman hefur á undanförnum árum verið að reyna að teikna upp hvernig olíuríkið Sádi-Arabía getur tekist á við heim án olíu, sem auður ríkisins byggist að nær öllu leyti á.
Í óvæginni umfjöllun dálkahöfundar hjá bandaríska vefritinu VICE segir að hugmyndin sé hreinlega afspyrnuheimskuleg.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir