Frá því Ásmundur Friðriksson, þingmaður Sjálfstæðisflokks, settist á þing árið 2013 hefur hann fengið 28.747.016 krónur endurgreiddar vegna aksturskostnaðar.
Ásmundur er sá þingmaður sem hefur fengið langmest endurgreitt vegna aksturskostnaðar það sem af er ári. Frá janúar til loka október hefur hann fengið endurgreiddar 2.834.790 króna fyrir ferðir á bílaleigubíl auk kostnaðar vegna eldsneytis upp á 628.159 krónur. Nemur upphæðin alls 3.462.949 krónum á árinu.
Á eftir Ásmundi kemur Vilhjálmur Árnason, þingmaður Sjálfstæðisflokks, með endurgreiðslur upp á um 2,3 milljónir króna. Eru endurgreiðslur til Ásmundar 52 prósent hærri en til Vilhjálms. Í þriðja sæti er Birgir Þórarinsson, þingmaður Miðflokksins, sem hefur fengið 1,6 milljónir króna endurgreiddar.
Ásmundur var kjörinn á þing árið 2013 fyrir suðurkjördæmi eftir að hafa verið bæjarstjóri í Garði. Frá upphafi þingsetu hefur hann fengið 23.447.944 krónur endurgreiddar fyrir ferðir á eigin bifreið. Þá hefur hann fengið samtals 4.000.840 krónur endurgreiddar í ár og í fyrra fyrir kostnað við bílaleigubíla. Ofan á það bætist kostnaður upp á 1.261.232 krónur í eldsneytiskostnað á þessum tæpu tveimur árum. Loks hefur hann fengið 37.000 krónur endurgreiddar vegna annars kostnaðar, en undir þann lið falla til dæmis gjöld í jarðgöng, leigubílar og fleira.
Þá er ótaldur fastur ferðakostnaður í kjördæmi sem hefur numið 4.666.494 krónum frá því Ásmundur settist á þing, auk greiðslna fyrir flugferðir og fargjöld innanlands, gisti- og fæðiskostnað innanlands, flugferðir utan lands, gisti- og fæðiskostnað erlendis, dagpeninga og annan ferðakostnað utan lands. Þingmenn fá einnig greiddan starfskostnað, síma- og netkostnað og fá þingmenn kjördæma utan höfuðborgarsvæðisins einnig greiddan húsnæðis- og dvalarkostnað.
Ásmundur endurgreiddi þó 178 þúsund krónur vegna aksturs sem tengdist þætti á sjónvarpsstöðinni ÍNN. „Ég leit þannig á að ég væri að slá tvær flugur í einu höggi; nýta ferð í þágu þingstarfa til að vinna að þáttagerðinni samhliða,“ sagði hann haustið 2018. „Slíkt orkar tvímælis. Vegna þess og að eigin frumkvæði, greiddi ég því skrifstofu Alþingis til baka þann 19. febrúar sl. 178.000 kr. vegna ferða sem mér höfðu verið endurgreiddar til þess að enginn vafi léki á því að rétt væri að staðið, enda vil ég alltaf koma rétt og heiðarlega fram.“
Ásmundur sagði nýlega frá því að hann hefði tilkynnt Þórhildi Sunnu Ævarsdóttir, þingmann Pírata og varaformann Íslandsdeildar Evrópuráðsþingsins, til Evrópuráðsþingsins vegna þess að hún hefði brotið siðareglur Alþingis. Þórhildur Sunna var fundin sek af siðanefnd Alþingis fyrir að brjóta siðareglurnar með því að segja „rökstuddan grun“ vera uppi um að Ásmundur hefði „dregið að sér fé“ með ofteknum endurgreiðslum vegna aksturs. Orðrétt sagði Þórhildur Sunna: „Nú er uppi rökstuddur grunur um það að Ásmundur Friðriksson hafi dregið að sér fé, almannafé, og við erum ekki að sjá viðbrögð þess efnis að það sé verið að setja á fót rannsókn á þessum efnum.“
Aksturskostnaður þingmanna
Lækkanir aksturgreiðslna sýna fram á kosti gagnsæis
Ásmundur þakkar fyrir „ómetanlegan stuðning“ í akstursmálinu
„Lögreglan er ekki með rannsóknarskyldu gagnvart alþingismönnum“
Þingmaður Samfylkingarinnar: „Óheppilegt fyrir þingið, ásýnd þess og störf“ en fellst samt á niðurstöðuna
Brot Þórhildar Sunnu á siðareglum staðfest í forsætisnefnd
Athugasemdir