Það er karlmannlegt að haga sér eins og kona

Það er karl­mann­legt að sparka bolta í mark. Það er karl­mann­legt að veiða fisk á tog­ara. Það er karl­mann­legt að taka 100 kíló í bekk og horfa á aðra karl­menn lumbra hvor á öðrum í box­hring. Það er karl­mann­legt að skjóta úr byssu og ybba gogg. Það er karl­mann­legt að keyra yfir hámarks­hraða.

Það er karl­mann­legt að taka áhættu – og yfir­stíga ótta.

Það er kven­legt að sauma í. Það er kven­legt að elda mat. Það er kven­legt að vinna í verslun. Það er kven­legt að halda hreinu. Það er kven­legt að ræða málin. Það er kven­legt að hjúkra sjúkum.

[adspot]Er það karl­mann­legt að bjarga manns­lífum? Er það karl­mann­legt að vinna 24 tíma á dag? Er það karl­mann­legt að lækna fólk? Er það karl­mann­legt að taka ógn og hættu með jafn­að­ar­geði? Er það karl­mann­legt að setja sjálfan sig í hættu til þess að bjarga manns­lífum?

58% starf­andi lyf­sala eru konur. 70% lyfja­fræð­inga eru konur. 92% geisla­fræð­inga eru konur. 97% sjúkra­liða eru konur. 97% hjúkr­un­ar­fræð­inga eru konur. 99% líf­einda­fræð­inga eru konur. Allar ljós­mæður Íslands eru konur.

Heilbrigðisstarfsfólk, eftir kyni og stétt (2019)

Rúmlega 85% heil­brigð­is­starfs­manna Íslands eru konur.

Ef horft er á fréttir mætti halda að það væri karl­mann­legt að ræða pen­inga­stefnu Seðla­bank­ans. Maður gæti líka haldið að það væri karl­mann­legt að útbúa efna­hag­s­pakka, til með að koma í veg fyrir það sem gæti auð­veld­lega orðið verra hrun en hrunið.

Víglínan gegn COVID-19 er að mestu mynduð af konum. Það eru aðal­lega konur sem mæta í vinn­una, taka sýni og hlúa að sjúkum, þrátt fyrir smit­hættu. Það eru fyrst og fremst konur sem stara framan í COVID-19 og berja ófétið á brott. Konur taka áhættu og yfir­stíga ótt­ann.

Kannski er orðið karl­mennska rang­nefni. Ef ekki þá hlýtur það að vera karl­mann­legt að haga sér eins og kona þessa dag­ana.