Vanvirðing við innflytjendur

Und­an­farnar vikur hefur far­ald­ur­inn geisað og yfir­völd gera sitt best til að miðla upp­lýs­ingum til lands­manna og er það vel. Við höfum fengið upp­lýs­ingar mat­reiddar með yfir­veg­uðum hætti og meira að segja nettröllin þegja að mestu og er þá mikið unnið.

En það er einn hópur sem mér sýn­ist hafa orðið illi­lega útundan. Við höfum jú séð að allar fréttir RÚV, og og ann­arra miðla að ein­hverju leyti líka, eru tákn­mál­stúlk­aðar þessa dag­ana, einnig blaða­manna­fundir Almanna­varna með land- og sótt­varna­lækni og fleirum. Þetta er mjög gott og sýnir vit­und um að ekki skilji allir tal­aða íslensku og að alvar­leiki máls­ins kallar á þetta. En ég hef ekki orðið var við að slíkir við­burðir séu túlk­aðir eða þýddir á tungu­mál inn­flytj­enda sem búa hér tug­þús­undum saman og eru einnig veiga­miklir skatt­borg­arar í þessu landi. Það er með ólík­indum að stjórn­völd og fjöl­miðlar sýni þessum borg­urum lands­ins í raun van­virð­ingu með þessum hætti, fyrir utan þá aug­ljósu stað­reynd að þeir hafa þá ekki sömu upp­lýs­ingar og vit­neskju til að átta sig á hvernig ber að hegða sér í þess­ari vá sem að steðjar.

[adspot]Það eru vissu­lega ein­hverjar felu­síður með ensku og pólsku hér og þar og meira að segja hefur eitt­hvað verið textað á ensku eins og allt þetta verka­fólk og iðn­að­ar­menn frá Austur-Evrópu, svo ekki sé minnst á fólk sem komið hefur enn lengra að, tali reiprenn­andi ensku. Svo er ekki, það er tómt mál að tala um að nota ensku sem sam­skipta­mál við stóra hópa inn­flytj­enda þegar um er að ræða svo alvar­legt mál sem þennan far­aldur. Það er ekki hægt að nota ensku sem alíbí þegar svona mikil vá steðjar að, það þarf að ávarpa fólkið á tungu­máli sem það skilur. Það hrein­lega verður að þýða eða túlka skila­boðin til fólks­ins.

Útvarps­stjóri hefur nefnt að verið væri að und­ir­búa ein­hverjar þýð­ingar á pólsku og er það vel, en það er of seint og ég ótt­ast að það verði ekki nógu mikið. Ekki þýðir að segja mér að það sé of þung­lama­legt eða ekki hægt, það eru til margar leiðir til að koma þessum upp­lýs­ingum á fram­færi, með þýddum skila­boðum, það væri hægt að sýna frétta­manna­fund­ina túlk­aða á hljóðrásum hjá fjöl­miðlum, eða textaða með ein­hverri seinkun. Það eru allir mögu­leikar fyrir hendi og þetta fólk á rétt á upp­lýs­ingum frá þeim yfir­völdum sem það greiðir skatta sína til. Ég geri þá kröfur að yfir­völd og fjöl­miðlar í þessu landi sinni öllum borg­urum þess óháð móð­ur­máli þeirra.