Forstjóri Kauphallarinnar segir að það sé aldrei hægt að tryggja að einhver fari ekki yfir á rauðu ljósi þótt það sé bannað. Fjárfestingaumhverfið hér sé þó mun tryggara og með öðrum hætti en fyrir áratug síðan. Dómar í stórum efnahagsbrotamálum hafi haft gríðarlegt gildi við að draga línu í sandinn.
„Það hafa verið gerðar margvíslegar úrbætur. Auðvitað hefur fjármálaeftirlit verið stóreflt á þessum tíma og breytingar gerðar á lagaumhverfinu sem ég held að séu mikilvægar. Svo hafa auðvitað fallið dómar í markaðsmisnotkunarmálum sem ég held að hafi hafi haft gríðarlegt gildi. Þessir dómar hafa sagt okkur með óyggjandi hætti hvað má og hvað má ekki og hverjar afleiðingarnar eru af því að fara út fyrir þá línu.“
Þetta segir Páll Harðarson, forstjóri Kauphallar Íslands, í viðtali við Þórð Snæ Júlíusson, ritstjóra Kjarnans, í sjónvarpsþættinum 21 á Hringbraut sem frumsýndur verður klukkan 21 í kvöld. Hægt er að sjá stiklu úr þætti kvöldsins hér að neðan.
Í þættinum ræðir Páll meðal annars um hvernig hefur tekist til að endurreisa íslenskan hlutabréfamarkað síðastliðinn áratug, um dóma í markaðsmisnotkunarmálum, þar sem stjórnendur og starfsmenn þriggja stærstu bankanna hafa verið fundnir sekir um slíkt athæfi, og hvort við getum með vissu fullyrt að slík hegðun eigi sér ekki stað í dag.
Páll skrifaði grein sem birtist á Kjarnanum í apríl 2016 þar sem hann sagði m.a.: „ „Alvarleg lögbrot voru framin. Afleitir viðskiptahættir kostuðu gríðarlega fjármuni og mikla þjáningu. Stórkostleg markaðsmisnotkun átti sér stað. Trú á markaðshagkerfið og hið frjálsa framtak hefur beðið hnekki.“
[adspot]Aðspurður hvort traust Íslendinga á markaðshagkerfið og hið frjálsa framtak hafi verið endurreist eftir hrunið, þar sem stór hluti markaðarins þurrkaðist út, segir Páll að við séum á veg komin að því markmiði. „En auðvitað tekur þetta allt tíma. Þetta er þolinmæðisvinna að byggja upp traust. Ég á von á því að þetta taki einhver ár í viðbót. Það er eðlilegt og heilbrigð af mínu viti. En ég held að þessi uppbygging og þetta starf sem hefur verið unnið síðustu árin séu til þess fallin að byggja traust. Ég finn að fyrirtæki á markaði, þau sem komið hafa inn og þau sem fyrir voru, taka hlutverk sitt mjög alvarlega og eru mjög áfram um að sinna skyldum sínum vel. En auðvitað tekur þetta tíma. Það tekur einfaldlega tíma að byggja upp traust.“
Páll segir að umgjörðin utan um verðbréfaviðskipti hérlendis sé orðin eins trygg og annars staðar. „Auðvitað er það þannig að þú getur aldrei tryggt að einhver hegði sér rétt og vel. Þú getur ekki tryggt að einhver keyri yfir á rauðu ljósi þó það séu boð og bönn við því. En ég held að við höfum bundið mjög vel um hnútana og að umhverfið hér sé mun tryggara og með allt öðrum hætti en fyrir áratug síðan.“
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir