Í bakherberginu furðar fólk sig á því að gengið hafi verið framhjá Vigdísi Hauksdóttur, formanni fjárlaganefndar og þingkonu Framsóknarflokksins í Reykjavíkurkjördæmi, við val á ráðherra í ríkisstjórn. En samt ekki. Það var orðið ljóst fyrir nokkru síðan að Sigmundur Davíð hafði augastað á annarri þingkonu í liði Framsóknar en henni í ríkisstjórnina. Sigrún Magnúsdóttir, formaður þingflokksins Framsóknarflokksins til þessa, verður næsti umhverfis- og auðlindaráðherra.
Vigdís sótti það stíft að verða ráðherra eftir kosningasigur Framsóknarflokksins í síðustu kosningum, og í bakherberginu er það rifjað upp að Guðni Ágústsson, fyrrverandi formaður flokksins, hafi móast í forystu flokksins fyrir hennar hönd. En án árangurs.
Það kom því eins og þruma úr heiðskíru lofti þegar Vigdís fór að gagnrýna harðlega kjördæmisskipan í landinu í Morgunblaðinu í dag (þó hún hafi kannski mikið til síns máls!) og að það þyrfti að breyta landinu í eitt kjördæmi. Þetta er atriði á nánast engan hljómgrunn í Framsóknarflokknum og hefur flokkurinn raunar lifað enn betra lífi vegna þess hvernig landinu eru skipt upp í kjördæmi. Í bakherberginu telur fólk augljóst að þarna sé Vigdís í Albaníu-taktíkinni; þegar hún sé að beina spjótunum að kjördæmisskipan þá sé hún í reynd að gagnrýna Sigmund Davíð og forystu flokksins fyrir að skipa sig ekki ráðherra. Spurning hvort þetta sé rétt mat? Þegar stórt er spurt er oft fátt um svör...
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir