Samskip segir að það sé með öllu óásættanlegt að Samkeppniseftirlitið eða Sérstakur saksóknari, afhendi fjölmiðlum upplýsingar þar sem bornar eru á fyrirtækið og aðra aðila alvarlegar sakir, sem „hlutaðeigandi einstaklingar og fyrirtæki hafa ekki verið upplýstir um og hafa enga möguleika á að svara fyrir sig eða bera hönd fyrir höfuð sér með neinum hætti[...] gögnum hefur verið komið til fjölmiðla um mál sem ekki er búið að ákveða hvort tekið verður til rannsóknar, hvað þá að ákærur hafi verið gefnar út. “. Þetta kemur fram í tilkynningu sem Samskip sendi frá sér rétt í þessu.
Í tilkynningunni segir einnig: „Það er vægast sagt undarlegt að vera leiksoppur í því sem virðist vera barátta ríkisstofnana fyrir tilvist sinni og/eða auknum fjárveitingum og gersamlega óásættanlegt að orðspori, mannorði og sjálfsögðum mannréttindum sé ýtt til hliðar fyrir slíka hagsmuni.“
Grunur um áralangt ólöglegt samráð
Kastljósið greindi frá því á þriðjudag að Samkeppniseftirlitið hafi kært ellefu starfsmenn og stjórnendur Samskipa og Eimskipa til embættis Sérstaks saksóknara fyrir meint brot á samkeppnislögum. Grunur leikur á að félögin hafi stundað ólöglegt samráð um árabil, en félögin sinna um tveimur þriðju allra farmflutninga til og frá landinu.
Kæran byggir á gögnum sem Samkeppniseftirlitið haldlagði í húsleitum sem það framkvæmdi hjá fyrirtækjunum tveimur og dótturfélögum þeirra í septembermánuði á síðasta ári og svo aftur í sumar.
Á meðal þeirra kærðu eru Gylfi Sigfússon, forstjóri Eimskipa, Pálmar Óli Magnússon, forstjóri Samskipa og Ásbjörn Gíslason, framkvæmdastjóri hjá erlendu dótturfélagi Samskipa.
Fréttatilkynning Samskipa í heild er svohljóðandi:
„Vegna frétta síðustu daga um ætlað samráð á flutningamarkaði vilja Samskip koma eftirfarandi á framfæri:
Félagið starfar af heilindum á markaði þar sem ríkir virk samkeppni. Það er skoðun okkar að skýr samkeppnislög og skilvirkt eftirlit séu nauðsynleg til að tryggja heilbrigt atvinnulíf.
Starfsemi Samskipa hefur ávallt grundvallast á samkeppni á öllum mörkuðum og félagið hefur verið leiðandi í að skapa virka samkeppni. Samskip hafa verið óhrædd við að benda eftirlitsaðilum á þegar félagið telur að keppinautar á markaði fari ekki að lögum. Ábendingar okkar til Samkeppniseftirlitsins hafa m.a. leitt til sektargreiðslna eins af samkeppnisaðilum okkar.
Eftirlitsaðilar gegna ábyrgðarmiklu hlutverki og heimildir þeirra til rannsókna eru afar víðtækar. Því er það sjálfsögð og eðlileg krafa að trúnaður ríki um gögn sem aflað er með jafn inngripsmikilli aðgerð og húsleit, með dómsúrskurði, á meðan mál eru til rannsóknar. Sá trúnaður er ekki til staðar og gögnum hefur verið komið til fjölmiðla um mál sem ekki er búið að ákveða hvort tekið verður til rannsóknar, hvað þá að ákærur hafi verið gefnar út.
Það er með öllu óásættanlegt að stjórnvöld (Samkeppniseftirlitið eða Sérstakur saksóknari) afhendi fjölmiðlum upplýsingar þar sem bornar eru á aðila alvarlegar sakir, sem hlutaðeigandi einstaklingar og fyrirtæki hafa ekki verið upplýstir um og hafa enga möguleika á að svara fyrir sig eða bera hönd fyrir höfuð sér með neinum hætti.
Það er vægast sagt undarlegt að vera leiksoppur í því sem virðist vera barátta ríkisstofnana fyrir tilvist sinni og/eða auknum fjárveitingum og gersamlega óásættanlegt að orðspori, mannorði og sjálfsögðum mannréttindum sé ýtt til hliðar fyrir slíka hagsmuni.
Hjá Samskipum starfa yfir 500 manns. Starfsfólkið og fjölskyldur þeirra þurfa að sitja undir órökstuddum dylgjum um mál sem enn er til skoðunar. Í gær sendi Samkeppniseftirlitið frá sér fréttatilkynningu þar sem segir að eftirlitið sé „ekki reiðubúið að staðfesta þá umfjöllun sem fram kom í Kastljósi í gærkvöldi. Þá skal sérstaklega tekið fram að rannsókn málsins er ekki komin á það stig að unnt sé að slá neinu föstu um niðurstöður hennar.“ Rétt er því að varast að fella dóm í málinu en bíða eftir því að niðurstaða liggi fyrir. Samskip hafa ekkert að fela og treysta því að niðurstaða skoðunar Samkeppniseftirlitsins og Sérstaks saksóknara sýni það.
Við vitum að ábyrgð okkar er mikil og við erum meðvituð um þær skyldur sem við berum gagnvart viðskiptavinum okkar og þá um leið almenningi í landinu.
Starfsfólk Samskipa hefur unnið ötullega og eftir bestu samvisku að því að stuðla að virkri samkeppni og aukinni hagsæld á Íslandi með því að bjóða viðskiptavinum sínum hagkvæmar lausnir í flutningum og flutningatengdri þjónustu atvinnulífinu í landinu og samfélaginu öllu til heilla.“
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir