Reykjavíkurborg auglýsir langmest hjá 365 prentmiðlum, en undir það heyra að minnsta kosti Fréttablaðið og fréttavefurinn Vísir. Hún keypti samtals birtingar á auglýsingum fyrir 110,2 milljónir króna á árinu 2013. Þar af runnu 19,5 milljónir króna, um 17 prósent allra keyptra birtinga, til 365-prentmiðla. Á fyrstu átta mánuðum ársins 2014 hefur hlutdeild 365-prentmiðla aukist. Samtals hefur Reykjavíkurborg keypt auglýsingar af miðlunum fyrir 18,7 milljónir króna. Þeir hafa því fengið beint um 21 prósent þeirra 90 milljóna króna sem höfuðborg landsins eyðir í birtingar auglýsinga. Þetta kemur fram í svar fjármálastjórna borgarinnar, Birgis Björns Sigurjónssonar, við fyrirspurn borgarfulltrúa Framsóknar og flugvallarvina um auglýsingakostnað Reykjavíkurborgar.
Til viðbótar keypti borgin birtingar í gegnum birtingarhús og auglýsingastofur fyrir umtalsvert fé. Hlutverk birtingarhúsa er að kaupa birtingar í hinum ýmsu miðlum fyrir viðskiptavini sína. Hluti þeirra birtinga ratar einnig til 365- prentmiðla. Það hlutfall auglýsingatekna sem rennur frá Reykjavíkurborg til 365-prentmiðla er því nær örugglega hærra en ofangreindar tölur gefa til kynna.
Auglýsingakostnaður
[visualizer id="8840"]
Ríkisútvarpið missir hlutdeild
Í fyrra greiddi borgin Ríkisútvarpinu næst mest fyrir birtingar á auglýsingum, eða 8,5 milljónir króna. Það þýðir að Ríkisrekni fjölmiðillinn fékk 7,7 prósent þeirra peninga sem stærsta sveitarfélag landsins eyddi í birtingar á auglýsingum í fyrra. Í ár hefur orðið breyting á og Reykjavík eytt mun minna í birtingar á auglýsingum hjá Ríkisútvarpinu, eða 3,9 milljónum króna. Hlutdeild þess af heildareyðslu borgarinnar hefur því dottið niður í 4,3 prósent.
Árvakur, sem gefur út Morgunblaðið og heldur úti stærsta fréttavef landsins mbl.is, virðist með nokkuð stöðuga áskrift af auglýsingatekjum frá borginni. Á árinu 2013 fékk útgáfufélagið 5,5 milljónir króna þaðan (um fimm prósent af heildareyðslu), og á fyrstu átta mánuðum ársins 2014 hafði það fengið um 4,7 milljónir króna frá henni (rúmlega fimm prósent af heildareyðslu).
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir