Skiptar skoðanir eru í baklandi Bjartrar framtíðar um hið nána samstarf Óttars Proppé við Viðreisn og fyrirhugað stjórnarsamstarf við Sjálfstæðisflokkinn. Stundin hefur rætt við áhrifafólk í Bjartri framtíð undanfarna daga sem furðar sig á því sem kallað er „síamstvíburasamband“ Óttars Proppé og Benedikts Jóhannessonar, formanns Viðreisnar. 

Þótt mörgum hugnist illa stjórnarmyndunarviðræðurnar við Sjálfstæðisflokkinn og Viðreisn er bent á að fyrst fimmflokkaviðræðurnar við VG, Samfylkinguna, Pírata og Viðreisn hafi tvívegis runnið út í sandinn sé eðlilegt að Óttarr Proppé spreyti sig í viðræðum við hægriflokkana. Hins vegar sé ekki sjálfgefið að stjórn Bjartrar framtíðar fallist á myndun slíkrar ríkisstjórnar. Til þess þurfi að gulltryggja að flokkurinn nái mikilvægum málum fram í slíku stjórnarsamstarfi. 

Stjórnarmenn í Bjartri framtíð og fyrrum þingmenn hafa furðað sig á því hvernig Óttarr límdi sig við Benedikt Jóhannesson eftir kosningarnar. „Ég er ekki viss um að þeir sem kusu Bjarta framtíð hafi endilega vitað að þeir væru líka að kjósa Benedikt,“ segir einn af viðmælendum Stundarinnar. 

Annar heimildarmaður Stundarinnar bendir á að Björt framtíð sé félagshyggjuflokkur að nafninu til. Þótt Viðreisn gefi sig út fyrir að vera frjálslyndur miðjuflokkur hafi flokkurinn sýnt á sér hægrisinnaðar hliðar eftir kosningar, beitt sér gegn hugmyndum um prógressífa skattlagningu og bakkað frá eigin útgjaldaloforðum. Félagshyggjufólk sem kaus Bjarta framtíð sé fjarri Viðreisn og Sjálfstæðisflokknum á hinu pólitíska litrófi og það komi á óvart hve tilbúnir þingmenn Bjartrar framtíðar voru að styðja umdeild og jafnvel vanreifuð mál ættuð frá starfandi starfsstjórn á desemberþingi. 

Fréttastofa RÚV greindi frá því í morgun að Róbert Marshall og Brynhildur Pétursdóttir, fyrrverandi þingmenn Bjartrar framtíðar, hefðu bæði ákveðið að segja sig úr flokknum. Haft var eftir þeim að ákvörðunin hefði ekkert með yfirstandandi stjórnarmyndunarviðræður að gera, heldur einungis það að þau ætli að snúa sér að öðru en stjórnmálum. Ýmislegt er þó lesið í úrsagnirnar og tímasetninguna þeirra innan flokksins, enda hófust formlegar viðræður Bjartrar framtíðar við Sjálfstæðisflokkinn og Viðreisn einmitt í dag. 

Óánægja innan Bjartrar framtíðar hefur stöku sinnum komið upp á yfirborðið eftir kosningar. Þannig hafði Fréttablaðið t.d. eftir Páli Val Björnssyni, fyrrverandi þingmanni flokksins, um miðjan nóvember að hann efaðist um að myndun ríkisstjórnar Sjálfstæðisflokksins, Viðreisnar og Bjartrar framtíðar tækist. „Ég tel að við eigum enga samleið,“ sagði hann. Freyja Haraldsdóttir, varaþingkona Bjartrar framtíðar á síðasta kjörtímabili, gagnrýndi svo Alþingi og flokksfélaga sína harðlega í stöðuuppfærslu á Facebook um helgina vegna laga um breyt­ingu á lög­um um mál­efni fatlaðs fólks sem keyrð voru í gegnum þingið á sólahring án þess að haft væri samráð við hagsmunasamtök fatlaðra. „Hvernig stendur á því að fólk, þ.m.t. samflokksfólk mitt, sem hefur gefið sig út fyrir það að styðja NPA og lögfestingu og veit hvaða mannréttindabrot felast í því að þetta sé ekki lögfest komi svona fram við fatlað fólk? Hvernig í ósköpunum eigum við að geta unnið með ykkur án tortryggni þegar við erum stungin svona í bakið?“ skrifaði Freyja.