Þorsteinn Víglundsson, félags- og jafnréttismálaráðherra, svarar gagnrýni Mikaels Torfasonar, í löngum pistli sem hann birti á Facebook í gærkvöld. Viðtal Egils Helgasonar við Mikael í Silfrinu á sunnudag hefur vakið mikla athygli en þar fjallaði Mikael með um fátækt á Íslandi. „Það er gott að sjá blaðamenn eins og Mikael beina sjónum sínum að þeim sem eiga undir högg að sækja í samfélaginu og benda á það sem betur megi fara. Mér fannst þó Mikael eyða mestum tíma sínum í að lýsa megnri andúð sinni á þessari ríkisstjórn og þeim sem í henni sitja og minni í að benda á hvað mætti gera til að bæta úr. Mátti helst á máli hans skilja að ríkisstjórn sú sem tók við fyrir tveimur mánuðum síðan bæri ein ábyrgð á því velferðarkerfi sem hér hefur verið byggt upp á undanförnum áratugum. (Væri reyndar nokkuð ánægður ef rétt væri) Einhverjir voguðu sér að benda á að umfjöllun Mikaels hefði ef til vill verið nokkuð einhliða og hlutu skammir fyrir,“ skrifar Þorsteinn meðal annars. 

„Sjálfur efast ég ekki um góðan ásetning Mikaels í garð þeirra sem glíma við fátækt.“

Hann segist stundum velta því fyrir sér hvort ekki sé hægt að taka uppbyggilega umræðu um það sem betur megi fara í samfélaginu án þess að þurfa að tala með niðrandi hætti um núverandi fyrirkomulag eða þá sem við það starfa. „Sjálfur efast ég ekki um góðan ásetning Mikaels í garð þeirra sem glíma við fátækt. Að sama skapi efast ég ekki um minn eigin vilja í þeim efnum eða allra sem ég hef kynnst á stuttum starfstíma mínum í Velferðarráðuneytinu eða inni á Alþingi. Ég er sannfærður um að allir þeir sem á þingi eru í dag brenna fyrir hugsjónum sínum og vilja láta gott af sér leiða þó svo skoðanir geti verið misjafnar á því hvaða leiðir séu bestar.“

Þorsteinn segir fátækt vissulega fyrirfinnast á Íslandi og að það sé sjálfsögð skylda okkar að liðsinna þeim sem þurfa á hjálp að halda með áframhaldandi uppbyggingu velferðarkerfisins. „Það má hins vegar líka benda á það sem hér hefur gengið vel án þess að það endurspegli lítinn metnað til þess að gera betur,“ skrifar hann og bendir meðal annars á að kaupmáttur hafi aukist mikið á undanförnum árum, launajöfnuður sé mikill hér á landi, atvinnuleysi lítið og að skuldir heimilanna hafi lækkað verulega. 

„Þessi ríkisstjórn mun, líkt og fyrri ríkisstjórnir, verða dæmd af verkum sínum líkt og aðrar ríkisstjórnir. Áform hennar um forgangsröðun í þágu velferðar eru sett fram með skýrum hætti í stjórnarsáttmála ríkisstjórnarinnar. Þau áform munu endurspeglast í fyrstu fimm ára ríkisfjármálaáætlun stjórnarinnar, sem kynnt verður á næstu vikum, fjárlögum næsta árs og þeim frumvörpum sem lögð verða fram á næstu vikum og mánuðum. Ég reikna með að Mikael muni kynna sér þau áform vandlega og vonandi koma með uppbyggilega gagnrýni á. Sjálfur er ég ávallt reiðubúinn að hlusta á slík ráð og taka slíkt samtal,“ skrifar Þorsteinn Víglundsson, félags- og jafnréttismálaráðherra. 

Í stjórnarsáttmála ríkisstjórnarinnar er ekki minnst á fátækt, en þar er rætt um samkeppnishæfni, kraftmikið atvinnulíf, stöðugleika á vinnumarkaði, að samfélagið verði barnvænt, að biðlistar styttist í heilbrigðiskerfinu, að lífeyrisaldur verði hækkaður og frítekjumark atvinnutekna þeirra hækkað, svo eitthvað sé nefnt.

Hér má lesa pistil Þorsteins í heild: