Hópur sem hefur mótmælt ríkisstjórninni ætlar að taka mótmælin skrefinu lengra og halda mótmæli við heimili ráðherra, ef kröfur þeirra verða ekki samþykktar.
Í yfirlýsingu hópsins kemur fram að Bjarni Benediktsson sé fyrstur.
„Ef ríkisstjórn Sigurðar Inga hefur ekki aðhafst fyrir 1. maí þá hittumst við, kæru landsmenn, stundvíslega við heimili Bjarna klukkan 19:00 þann 1. maí.“
Hópurinn krefst þess að mynduð verði utanþingsstjórn og að ríkisstjórnin segi af sér. Kosningar verði ekki síðar en 10. september.
Eftir mótmæli í kjölfar birtingu upplýsinga úr Panama-skjölunum, þar sem leyndir hagsmunir forsætisráðherra urðu ljósir, var því lýst yfir að stefnt væri að kosningum næsta haust.
Ekki víst hvenær kosningar verða
Bjarni Bendiktsson var spurður hvenær haldnar yrðu kosningar í sjónvarpsfréttum RÚV, eftir fund með stjórnarandstöðunni í gær. „Já, við svona með öllum fyrirvörum um eðlilegan framgang þingstarfanna þá vorum við að ræða um það að síðari hluti október gæti verið ágætlega ákjósanlegur tími.“
Stuðningur við ríkisstjórnina mældist 34% í síðustu Gallup-könnun sem birt var fyrir tíu dögum, en hún skilyrðir boðun kosninga við að málaskrá hennar nái fram að ganga með eðlilegum hætti.
Skipuleggjendur mótmælanna taka fram að þau verði friðsamleg. „Hópurinn hvetur alla landsmenn til að mæta í grillið með einnota grill, mat, tjaldstóla, trommur og góða skapið. Einnig er gott að æfa raddböndin aðeins og slagorð til þess að syngja. Í kjölfarið verða heimili ráðherra ríkisstjórnarinnar þrædd, eitt heimili á kvöldi. Látum þá ekki sitja eina að grilli og gróða á kostnað okkar hinna!“
Atburðurinn gagnrýndur
Mótmælin hafa verið gagnrýnd, en mótmælendurnir rökstyðja röskun á heimili ráðherra með því að flokkar viðkomandi ráðherra hafi vegið að friðhelgi heimila landsmanna.
„Í samanburði við þá árás sem íslensk heimili máttu þola í hruninu mega rök um friðhelgi heimilis formanns Sjálfstæðisflokksins sín lítils, það var nú einu sinni hans flokkur sem tók þátt í árásinni á heimili landsins.“
Margir hafa skrifað skilaboð til skipuleggjenda á Facebook-síðu atburðarins. Meðal þeirra eru Vilhjálmur Þorsteinsson, fjárfestir og einn eigenda Kjarnans. „Ég mun ekki mæta þarna. Þetta er of langt gengið og ekki málstaðnum til framdráttar,“ skrifar hann.
Athugasemdir