Græn­lenski tog­ar­inn Polar Nanoq er á leið til Íslands. Þetta stað­festi skip­stjóri tog­ar­ans í sam­tali við Stundina nú fyrir skömmu. Skip­stjór­inn heitir Julian Nolsø og kemur frá Færeyjum. Lög­reglan vill ræða við þá sem sjást á mynd­bandi. Ljósmynd sem Stundin kom á fram­færi við lög­regl­una fyrr í dag sýnir að Birna var stödd á veit­inga­staðnum Ali Baba við Ing­ólfs­torg áður en hún hvarf.

Danska varð­skipið HDMS Triton siglir nú til móts við Julian Nolsø og áhöfn hans en sam­kvæmt þeim upp­lýs­ingum sem Stundin hefur undir höndum kemur það til með að taka Polar Nanoq um það bil einn og hálfan sól­ar­hring að sigla aftur til Íslands miðað við síð­ustu upp­lýs­ingar um stað­setn­ingu þeirra í gegnum gervi­hnetti.

Julian Nolsø skip­stjóri stað­festi í sam­tali við Stundina að skipið væri á leið hingað til lands, en hann gat ekki til­greint hvenær það kæmi. „Ég veit ekki hvenær við komum aftur til Íslands,“ segir hann.

Skip­stjóri Polar NanoqAð sögn skip­stjór­ans er skip­inu nú siglt í átt til Íslands.

Mynd:

Vilja ræða við fólk á myndbandi

Grímur Grímsson rann­sókn­ar­lög­reglu­maður segir að eng­inn hafi rétt­ar­stöðu grun­aðs manns og eng­inn hafi verið hand­tek­inn. Jafn­framt segir hann engan hafa verið yfir­heyrðan. Hann vill ekki að svo stöddu gefa upp­lýs­ingar um aðgerðir sem tengj­ast tog­ar­anum Polar Nanoq. 

„Þetta er mál sem fær mikið á fólk,“ segir Grímur. „Við höfum ákveðið að svara með þeim hætti að við getum ekki tjáð okkur um hvað við erum að gera núna og við höfum sagt að rann­sóknin sé á við­kvæmu stigi. En það er hægt að lesa í það að það er eitt­hvað að ger­ast og við erum að reyna að afla ein­hverra upp­lýs­inga og gagna. Ég verð þó að segja það að það hefur eng­inn verið hand­tek­inn og eng­inn verið yfir­heyrður og eng­inn hefur rétt­ar­stöðu grun­aðs manns.“ 

Lög­reglan vill ræða við þá sem sjást á mynd­band­inu sem gefið var út af síð­ustu mín­út­unum áður en Birna hvarf í mið­borg Reykja­víkur. Enginn hefur hins vegar gefið sig fram sem sást á mynd­band­inu.

Færeyingar og Grænlendingar í áhöfn

Rauða Kia Rio-bif­reiðin sem lög­reglan hefur leitað að og sú stað­reynd að skór Birnu fund­ust við Hafn­ar­fjarð­ar­höfn er ástæða þess að íslensk lög­reglu­yf­ir­völd vilja ná tali af með­limum úr áhöfn tog­ar­ans. Bif­reiðin var leigð hjá Bíla­leigu Akur­eyrar af nokkrum úr áhöfn­inni. Ekki liggur fyrir á þess­ari stundu hverjir það voru sem leigðu bif­reið­ina en talið er að tutt­ugu og þrír skip­verjar séu í áhöfn tog­ar­ans sem nú siglir til Íslands. Þar af eru átta til níu Fær­ey­ingar og um það bil fimmtán Græn­lend­ingar.

„Honum líður ekki vel yfir þessu og seg­ist hafa átt hræði­legan dag“

Flestir þeirra Fær­ey­inga sem eru um borð hafa komið hingað til lands margoft. Samkvæmt aðstand­anda fær­eyska skip­stjór­ans Julian Nolsø hefur málið komið honum algjör­lega í opna skjöldu.

Hafa áður tekið bílaleigubíl í Reykjavík

„Honum líður ekki vel yfir þessu og seg­ist hafa átt hræði­legan dag. Þetta er allt svo ótrú­legt. Strák­arnir um borð vita um hvað málið snýst og hin áhöfnin sem er í landi er líka að fylgj­ast náið með mál­inu,“ sagði aðstand­andi sem Stundin ræddi við í dag.

Togarinn Polar Nanoq á heima­höfn í Uummannaq á Norð­vestur-Græn­landi, 1.300 manna bæ sem liggur 590 kíló­metrum norður af norður-heim­skauts­baug. Nafn skips­ins merkir Ísbjörn­inn á íslensku.

Samkvæmt heim­ildum Stund­ar­innar er þetta ekki í fyrsta skiptið sem græn­lenskir skip­verjar í áhöfn Polar Nanoq taka bíla­leigu­bíl í Reykja­vík en tog­ar­inn hefur komið reglu­lega til Íslands í tvo ára­tugi. Togarinn landar alltaf í Hafn­ar­fjarð­ar­höfn. Áhöfnin var þó ekki að landa um helg­ina.

Samkvæmt upp­lýs­ingum Stund­ar­innar var skipið nýkomið frá Danmörku þar sem það kláraði kvót­ann sinn. Lagt var af stað til Íslands til þess að kaupa pakkn­ingar fyrir afl­ann og til þess að taka um borð græn­lenska áhöfn sem kom með flugi frá Græn­landi.

Vegna slæms veð­urs í Græn­landi seink­aði hluta áhafn­ar­innar, þar sem ekki var flogið á til­settum tíma og því varð tog­ar­inn að bíða í Hafn­ar­fjarð­ar­höfn.

Áætlað var að leggja á haf út mun fyrr. Togarinn var á leið til grá­lúðu­veiða þegar áhöfnin fékk skipun um að stöðva för sína og snúa aftur til Íslands.

Samkvæmt heim­ildum Stund­ar­innar mun skip­stjór­inn hafa verið mjög sam­vinnu­þýður og strax farið eftir fyr­ir­mælum danskra og íslenskra yfir­valda.

Hvar mun togarinn leggjast að höfn?

Samkvæmt heim­ildum Stund­ar­innar er mjög lík­legt að höfn á suð­vest­ur­horni lands­ins verði sú sem skipið kemur til með að leggj­ast að.

Þar hafa tvær Reykja­nes­hafnir verið nefndar en það er höfnin í Keflavík og höfnin í Helguvík. Auðvelt er að tak­marka og loka aðgengi að þessum svæðum og því telja heim­ild­ar­menn Stund­ar­innar það lík­legt að þær verði fyrir val­inu.

Engar upp­lýs­ingar er að fá hjá lög­regl­unni, Land­helg­is­gæsl­unni eða Rík­is­lög­reglu­stjóra en sam­kvæmt fréttum ann­arra miðla hefur þyrla Land­helg­is­gæsl­unnar verið kölluð út og henni flogið í átt að tog­ar­anum og varð­skip­inu. Um borð eru íslenskir lög­reglu­menn, bæði sér­sveit­ar­menn og rann­sókn­ar­lög­reglu­menn sem koma til með að yfir­heyra áhöfnin og fylgja tog­ar­anum til Íslands.

Keypti mat á Ali baba

Birna Brjáns­dóttirSíðasta ljós­myndin sem tekin var af Birnu Brjáns­dóttur áður en hún hvarf.

Mynd:

Birna er talin hafa farið upp í bíl nálægt Lauga­vegi. Samkvæmt nýjum upp­lýs­ingum sem Stundin kom til lög­regl­unnar fyrr í dag keypti Birna mat á veit­inga­staðnum Ali Baba við Ing­ólfs­torg seint um nótt­ina. Samkvæmt lög­reglu er konan á mynd­inni Birna Brjáns­dóttir. Hún sést síðar ganga með mat upp Lauga­veg­inn á mynd­bandi sem lög­reglan birti almenn­ingi í gær.

Enginn þeirra aðila sem sáust á mynd­band­inu hafa gefið sig fram við lög­reglu, að sögn Gríms Gríms­sonar, sem þó vill ná af þeim tali. Hann ítrek­aði rétt fyrir mið­nætti að eng­inn væri með rétt­ar­stöðu grun­aðs manns, að Birna hefði ekki fund­ist og eng­inn hafi verið hand­tek­inn.