Séra Örn Bárður Jónsson, sóknarprestur í Neskirkju og fyrrverandi fulltrúi í stjórnlagaráði, varar við áhrifum múslima á evrópsk samfélög í Facebook-færslu.
Í mynd sem séra Örn Bárður deilir á Facebook-síðu sinni sýnir hann meintan mun á Afganistan ársins 1970 og nútímans. Samanburðurinn sýnir tvær ljósmyndir. Á þeirri fyrri eru íbúar landsins frjálslega klæddir, en á þeirri síðari eru þeir íklæddir búrkum.
Neðsta myndin gefur svo í skyn að Evrópa árið 2050 verði eins og Afganistan í dag. „Hvað bíður Evrópu? Þetta?“ spyr Örn Bárður.
„Þetta er ekki sett á vegginn minn af ótta við flóttamenn“
Í athugasemd við myndina tekur hann sérstaklega fram að hann hræðist ekki flóttamenn heldur ógnina við evrópskan menningararf. „Tek fram að þetta er ekki sett á vegginn minn af ótta við flóttamenn sem við verðum að hjálpa heldur til að minna Evrópubúa á að standa vörð um eigin menningararf,“ skrifar Örn Bárður. Kjarninn greindi fyrst frá deilingu prestsins.
Séra Örn Bárður er í leyfi frá störfum við Neskirkju. Myndinni deilir hann af síðu konu að nafni Daniela Serban. Ef síða hennar er skoðuð má sjá gífurlegt magn af samskonar áróðursmyndum gegn Islam. Í bland við múslímahatur deilir umrædd kona myndum sem lofa Ísrael.
Um síðustu helgi baðst séra Örn Bárður afsökunar á því að líkja guð- og trúleysissamtökunum Vantrú við hryðjuverkasamtökin ISIS. Þá, líkt og nú, deildi hann færslunni í formi spurningar og spurði hvort það sé stigs- eða eðlismunur á Vantrú og hryðjuverkasamtökunum ISIS. Á myndinni sést maður, vopnaður hríðskotabyssu og merktur ISIS og Vantrú, skjóta vængjaða kirkjunnar menn í höfuðið. Á myndinni er spurningin: „Stigs- eða eðlismunur?“
„Í gær, föstudagskvöldið 28. ágúst, fór ég framúr sjálfum mér, sem ekki verður nánar útskýrt hér, með því að birta ósmekklega teikningu á Facabook. Ég vil biðjast afsökunar á að hafa vegið ómaklega að félögum í Vantrú og öðrum sem kunna að hafa tekið þetta til sín. Mér þykir leitt að hafa látið þetta frá mér fara og bið þolendur að fyrirgefa mér mistökin.“
Örn Bárður er ekki sá eini sem varað hefur verið íslömskum áhrifum á Evrópu og Ísland. Í mars birti Arnþrúður Karlsdóttir, útvarpsstjóri á Útvarpi sögu, mynd af sér í eins konar búrku og spurði: „Munu útvarpsmenn framtíðarinnar líta svona út?“
Samkvæmt mannfjöldaspá Pew Research mun hlutfall múslima í Evrópu allri aukast úr 6% í 10% til ársins 2050.
Athugasemdir