Birgitta Jónsdóttir, þingkona Pírata, gagnrýnir Helga Hrafn Gunnarsson, þingmann sama flokks, harðlega vegna ummæla sem höfð eru eftir honum á vef Kjarnans. Fyrr í vikunni skarst í odda milli áhrifafólks í flokknum á samfélagsmiðlum, en deilunum lyktaði með hvatningu Birgittu til félaga sinna um að bera klæði á vopnin. Það virðist hins vegar ekki hafa tekist.

Í viðtali Kjarnans við Helga Hrafn sem birtist í morgun er haft eftir honum í óbeinni ræðu að það sé misskilningur að Píratar vilji styttra þing á næsta kjörtímabili. „Það er hins vegar Birgitta Jónsdóttir sem er á þeirri skoðun, en Helgi Hrafn undirstrikar að tillagan hafi verið felld á aðalfundi og að hann sé ekki sammála Birgittu í þessu máli,“ segir í greininni. 

Birgitta Jónsdóttir hefur brugðist við ummælunum á Facebook með því að saka Helga Hrafn um „stórkostlega mikla rangfærslu“. Orðrétt skrifar hún:

„Helgi Hrafn virðist algerlega gleyma því að þetta er bara ekki tillagan mín heldur tillaga sem hlaut langmestan stuðning frá félögum okkar í kosningakerfinu: Betri aðafundur um þau málefni sem Píratar vildu leggja áherslu á á aðalfundinum. Síðan er það stórkostlega mikil rangfærsla að segja að tillagan hafi verið felld, henni var breytt smávægilega þar sem ákveðið var að hafa það opnara en ella að hafa þetta lengur en 9 mánuði, þetta er þó samkvæmt tillögunni ekki ályktun um lengra tímabil en eitt þing. Eitt þing er eitt ár og eitt kjörtímabil eru fjögur ár.“

Í athugasemd undir færslunni segir Birgitta: „Ég er búin að rétta útrétta sáttarhönd og bað HHG um að taka ekki viðtöl um ágreiningsmál, hann hefur því miður ekki virt það. Verð að geta útskýrt rangfærslur.“

Ályktunina sem málið snýst um má finna á vef Pírata og var samþykkt í kosningakerfi flokksins. Þar er hvatt til þess að eftir næstu kosningar „muni næsta þing fjalla um og samþykkja tvö mál“ og að því loknu verði „boðað til nýrra þingkosninga“. 

Uppfært 28. febrúar kl. 13:30

Helgi Hrafn Gunnarsson hefur birt eftirfarandi yfirlýsingu á Pírataspjallinu:

Óhreinn þvottur Pírata hér, fyrir allra augum eins og venjulega.
1. Ég vil biðja Pírata afsökunar á því að hafa dýpkað misskilning um tilhögun næsta kjörtímabils í sambandi við stjórnarskrána. Mér hafði skilist á öllum sem ég hafði talað við um málið, að upprunaleg tillaga hefði verið sú að á næsta kjörtímabili myndum við einungis fara í tvö mál, þ.e. ESB-umsóknina og stjórnarskrána og gera þetta á stuttu kjörtímabili, nánar til tekið á 6-9 mánaða tímabili. Sú tillaga skildist mér að hefði verið felld og að í staðinn hefði verið samþykkt að leggja fókus á þessi tvö mál án skilyrðis um stutt kjörtímabil og án þess að fjalla einungis um þessi tvö mál. Við lestur á tillögunni sem var samþykkt var stendur: "Aðalfundur Pírata ályktar því að leggja fyrir flokksmenn að Píratar lofi íslensku þjóðinni, að fái flokkurinn umboð hennar í næstu kosningum til Alþingis muni næsta þing fjalla um og samþykkja tvö mál."
Strangt til tekið þýðir þetta að það verði bara eitt þing, eins og Birgitta bendir á, án þess að tilgreint verði hversu langt það sé. Það er lítið skrýtið að þetta valdi ruglingi. Ég get tekið á mig ábyrgð á því að hafa misskilið þetta upprunalega og sömuleiðis að í kjölfarið dreift út einhverjum misskilningi um þetta. Ég bið sjálfan mig afsökunar á því, en flokkinn afsökunar á því að hafa dýpkað misskilninginn frekar en valda því að hann skerptist.
Að því sögðu, þá stendur eftir að skilningur fólks er óljós um þetta, ekki bara minn heldur fjölmargra annarra. Fjölmargir sem greiddu tillögunni atkvæði skildu hana þannig að skilyrðið um stutt kjörtímabil væri ekki lengur með. Ég hef áður sagt í viðtali, við Harmageddon nánar til tekið, að ég væri vissulega til í að stefna að stuttu kjörtímabili en að ég gæti ekki lofað því vegna þess að ég veit ekki hvernig öðrum tekst að skemma fyrir ferlinu, en það eru fjölmargar leiðir til að skemma fyrir málum á Alþingi. Í tillögunni stendur ekkert um hvernig nákvæmlega við hyggjumst ná markmiðinu á einu þingi, en augaleið hlýtur að gefa að málið verður þafið í döðlur af andstæðingum þess, eins og maður segir á nútíma-íslensku.
Tillaga hefur komið fram um að við skerpum á stefnunni og skýrum hana þannig að það fari ekkert á milli mála um hvað sé að ræða, enda ótækt að það sé ólíkur skilningur fólks um svo mikilvægt mál.
2. Ég vil biðja Birgittu Jónsdóttur afsökunar á orðum mínum sem birtust í Morgunblaðinu snemma í nýliðinni viku (að mér þætti skjóta skökku við o.s.frv.). Um leið og ég sá umræðuna í kjölfarið fór ég að velta fyrir mér hvort ég skuldaði henni afsökunarbeiðni og hefði hlaupið fram fyrir mig, en þá var ég ennþá svo gríðarlega reiður að mér fannst þetta einhvern veginn þurfi. Ég sé núna að það hefði verið mun betra að ræða málið fyrst við Birgittu, en satt best að segja var á þeim tíma ekki talsamband milli okkar, sem er eitthvað sem við höfum reynt að laga síðan þá. Mér var gjörsamlega misboðið en ég sé núna að það réttlætir ekki að ganga fram með þeim hætti sem ég gerði þá. Því vil ég biðja Birgittu Jónsdóttur innilega afsökunar á því.
Hitt er að ég stend við að við þurfum að ræða hvernig við ætlum að fara með vald, og það beinist ekki einungis að Birgittu Jónsdóttur. Ég hef líka stundum farið óvarlega með vald sjálfur og vil endilega að við höldum þeirri umræðu áfram, en þá frekar í góðu rúmi þar sem við getum tekið málið fyrir með sem minnstri hættu á deilum. Vald er þess eðlis að það veldur deilum og fólki þykir það jafnan þung ásökun að hafa misbeitt því og þess vegna mikilvægt að við reynum að ræða það af sem mestri yfirvegun og í aðstæðum þar sem við getum hvað best tekist á við erfið mál.
3. Það er rétt hjá Birgittu Jónsdóttur að hún bað mig um að vera ekki með neinar bombur í fjölmiðlum og ég hef reynt að forðast þær. Það mistókst greinilega vegna ólíks skilnings á því hvernig hafi farið á síðasta aðalfundi og nákvæmlega hvert eðli tillögunnar sé sem samþykkt var. Ég vil biðja hana afsökunar á því að hafa ekki farið varlegar í fjölmiðlum. Ég reyndi en það mistókst og það er á mína ábyrgð.