Íslenska ríkið fékk ekki krónu fyrir Vélskóla Íslands, Stýrimannaskólann og Iðnskólann í Reykjavík þegar skólarnir voru lagðir niður og eignir þeirra færðar í hendur Menntafélagsins/Fjöltækniskólans og Tækniskólans. Þetta kemur fram í svörum Kristjáns Þórs Júlíussonar, mennta- og menningarmálaráðherra, við skriflegum fyrirspurnum Svandísar Svavarsdóttur, þingmanns Vinstri grænna. Svandís spurði Kristján Þór meðal annars hvert hefði verið virði þeirra eigna sem runnu yfir til einkaaðila með þessum hætti. Þá spurði hún hvað umræddir aðilar, svo sem Tækniskólinn, hefðu greitt íslenska ríkinu fyrir skólana.

Í svörum menntamálaráðherra kemur fram að ekkert hafi verið greitt skólana eða eignir þeirra þar sem þær væru tæknilega séð ennþá í eigu ríkisins. Menntafélaginu/Fjöltækniskólanum og síðar Tækniskólanum hafi einfaldlega verið falin rekstur þeirra eigna sem þeir fengu við sameiningu við umrædda skóla. Ráðherra segir jafnframt að engar greiðslur hafi átt sér stað fyrir skólana eða þær eignir sem þeim fylgdu. Ríkið sé ennþá eigandi allra þessara eigna þrátt fyrir að aðilar í einkarekstri hafi nú umsjón með þeim og afnot af þeim. Stundin greindi nýlega frá því að Iðnskólinn í Reykjavík hefði runnið með þessum sama hætti inn í Tækniskólann án þess þó að ríkið hefði fengið nokkuð greitt fyrir.