Óttarr Proppé, heilbrigðisráðherra og formaður Bjartrar framtíðar, segist ánægður með rökstuðning Sigríðar Á. Andersen dómsmálaráðherra fyrir því að vikið verði frá tillögum dómnefndar um skipan dómara við Landsrétt. Þetta kom fram í ræðu hans á Alþingi áðan.

Óttarr sagði Sigríði hafa rökstutt fyrir stjórnskipunar- og eftirlitsnefnd að hún telji að fleira eigi að koma til álita þegar skipað er í dóminn, meðal annars dómarareynslu. „Ég tek undir og samþykki þá röksemdarfærslu,“ sagði Óttarr. Þá sagði hann einnig nauðsynlegt að horfa til kynjasjónarmiða við skipun dómara við Landsrétt. Dómsmálaráðherra hefur lýst sig mótfallna slíkri nálgun.

Þegar Óttari var bent á að rökstuðningur Sigríðar fyrir tillögu sinni væri stuttur og ekki sérlega ítarlegur sagðist Óttarr gefa lítið fyrir blaðsíðutöl. „Rökstuðningur er ekki endilega betri ef hann er á fleiri blaðsíðum eða verri ef hann er á færri blaðsíðum. Margar af þeim merkustu upplýsingum, bókum og svo framvegis sem ég hef lesið, segjum t.d. bara Bókin um veginn, eru mjög stuttar... og mikið, t.d. íslenska stjórnarskráin, líka nýja íslenska stjórnarskráin, eru tiltölulega stutt plögg en þau skipta samt miklu máli,“ sagði hann. Óttarr sagðist í grunninn vera „sáttur við að ráðherra hafi rökstutt sína tillögu“. 

Á meðal þeirra sem dómsmálaráðherra vill ekki skipa sem dómara við Landsrétt, þrátt fyrir mat dómnefndarinnar, er Eiríkur Jónsson en hann var í sjöunda sæti hjá nefndinni og er með meiri dómarareynslu en aðrir á lista ráðherrans. Jóhannes Karl Sveinsson hæstaréttarlögmaður er á meðal þeirra sem hefur bent á, í umsögn við tillögu Sigríðar, að hrókeringar ráðherra geti ekki byggt á því að hún hafi talið dómarareynslu eiga að hafa meira hæfi en nefndin ákvað, enda hafi Eiríki verið skipt út á meðan aðrir umsækjendur með minni dómarareynslu voru látnir í friði. 

Mikill titringur hefur verið vegna málsins, en afgreiðslu þess var frestað í eftir langan þingfund í nótt. Málið hefur vakið mikla athygli en tillaga Sigríðar felur í sér að fjórir umsækjendur af þeim fimmtán sem dómnefnd taldi hæfasta verði ekki skipaðir dómarar en aðrir fjórir umsækjendur verði skipaðir í þeirra stað. Óttarr sagði ljóst miðað við umræðuna á Alþingi í dag að það væri ekki í augsýn að það myndist breið pólitísk sátt um málið. 

Þá sagði hann hlutverk Alþingis ekki vera að vera ný matsnefnd í málinu, heldur felist ákvörðun þingmanna í því að vera neitunarvald, það er að samþykkja eða hafna tillögu ráðherra.