Heimildir Stundarinnar herma að mál sérstaks saksóknara gegn Ólafi Helga Þorgrímssyni, fyrrum forstöðumanni trúfélagsins Zúisma, beinist líka gegn bræðrunum Einari og Ágústi Arnari Ágústssonum. Það sé raunar sama málið.

Því má segja að öll fyrri stjórn trúfélagsins hafi verið í rannsókn hjá sérstökum saksóknara. Heimildir Stundarinnar herma þó að það mál beinist þó ekki að trúfélaginu sjálfu og viðkomandi aðilar tengjast félaginu ekki lengur.

Í samtali við Stundina staðfestir Ólafur Þór Hauksson, sérstakur saksóknari, að rannsókn málsins sé lokið og komin í ákærumeðferð. Ekki er vitað hver aðkoma bræðranna er að málinu.

Stundin hefur ítrekað fjallað um bæði bræðurna og Ólaf Helga. Greint var frá því í apríl síðastliðnum að málið snerist um peningaþvott í gegnum félag Ólafs Helga, Luxury Adventures. Þá sagði Ólafur Þór að rannsókn hafi staðið yfir um nokkurt skeið og að málið hafi komið upp árið 2013.

Samkvæmt heimildum Stundarinnar snýst meint afbrot Ólafs Helga meðal annars um millifærslu á fé frá Eystrasaltslöndunum til Íslands þar sem ferðaþjónustufyrirtæki hans var nýtt í þeim tilgangi. Samkvæmt heimildum skaut Seðlabanki Íslands málinu til sérstaks saksóknara. Fyrir nokkrum mánuðum sat Ólafur Helgi sat í gæsluvarðhaldi vegna málsins. Samkvæmt heimildum Stundarinnar má rekja upphaf málsins til þess að Seðlabanki Íslands fór að kanna innborganir á reikninga vegna ferða á vegum Luxury Adventures.

Segir fréttina ósanngjarna

Fyrr í dag birtist frétt á vef RÚV þar sem bræðurnir eru sagðir skráðir fyrir trúfélaginu Zúismi, sem nú nýtur vaxandi vinsælda. Meðal þeirra sem hafa skráð sig í félag Zúista, sem snýst um að afnema sóknargjöld, er Birgitta Jónsdóttir, þingmaður Pírata. Að sögn talsmanns Zúista, Arnórs Bjarka Svarfdal, er sú frétt ekki með öllu rétt. Hann segir að nýtt rekstrarfélag hafi verið stofnað utan um trúarsöfnuðinn og að hvorki Ólafur Helgi né bræðurnir séu tengdir því. Að hans sögn má raunar rekja yfirtöku núverandi forstöðumann til fréttar Stundarinnar um rannsókn sérstaks saksóknara á Ólafi Helga. „Þessi frétt er allavega ekki mjög sanngjörn. Það sem er rétt í málinu er að þessi menn voru virkilega í stjórn rekstrarfélagsins en þeir hafa ekki verið á neinn hátt eftir að við tókum félagið yfir,“ segir Arnór. 

„Þessir bræður koma ekki á neinn hátt félaginu við“ 

Að hans sögn hefur nýtt rekstrarfélag verið stofnað utan um félagið en skráningu þess er ekki formlega lokið. „Við erum búnir að skrá Ísak Andra [Ólafsson] fyrir félaginu hjá sýslumanni og það er samþykkt. Hann viðurkennir okkur sem stjórn trúfélagsins og Ísak Andra sem æðstaprest. Þessir bræður koma ekki á neinn hátt félaginu við,“ segir Arnór.