Óeirðir og mótmæli í Bandaríkjunum eftir að niðurstöður kosninga voru ljós

Ósáttir borg­arar hóp­uð­ust saman í Banda­ríkj­unum og mót­mæltu í nótt eftir að nið­ur­stöður for­seta­kosn­ing­ana lágu fyrir. Á sumum stöðum urðu mót­mælin að óeirðum þar sem hópar fólks kveiktu elda og brutu rúður. 

Mótmæli brut­ust út víðs vegar um landið, en voru þó mest áber­andi meðal háskóla­nema í Kali­forníu í Oregon-ríki, þar sem Hillary Clinton fór með sigur af hólmi. Það dugði þó ekki til að tryggja henni sigur í for­seta­kosn­ing­unum. 

„Til fjand­ans með Donald Trump!“

Ósáttir kjós­endur tóku reiði sína út með því að brenna fána og hrópa: „Ekki minn for­seti!“ [e. Not my pres­ident,] „Til fjand­ans með Donald Trump!“ [e. Fuck Donald Trump] og „Fólkið, sam­einað mun aldrei verða sundrað,“ [e. The people, united, will never be divided.]

Víða í Banda­ríkj­unum er lög­reglan í við­bragðs­stöðu vegna hættu á óeirðum, en talið er að fólk muni sætta sig við úrslit kosn­ing­ana og mót­mæl­unum muni ljúka fljót­lega.

Sigur Trumps í nótt kom mörgum á óvart, því und­an­farnar vikur hefur Clinton haft yfir­hönd­ina sam­kvæmt könn­unum. Hún var öld­ung­ar­deild­ar­þing­kona á árunum 2001 til 2009, inn­an­rík­is­ráð­herra Banda­ríkj­anna undir stjórn Obama frá 2009 til 2013 og fylgdi eig­in­manni sínum, Bill Clinton, í Hvíta húsið þegar hann var kjör­inn for­seti. Hinn nýkjörni for­seti, Donald J. Trump, hefur hins vegar aldrei komið nálægt stjórn­málum áður. 

Tef Poe, áber­andi tals­maður Black Lives Matter hreyf­ing­ar­innar sem berst fyrir auknu rétt­læti til handa svörtum í Band­ríkj­unum, vakti tals­verða athygli í mars síð­ast­liðnum. Þá lýsti hann því yfir á Twitter að færi svo að Trump sigr­aði þá yrðu óeirðir all­staðar. „Ágæta hvíta fólk. Ef Trump sigrar eru ungir blökku­menn eins og ég aldeilis harð­á­kveðnir í að hefja óeirðir hvert sem við förum. Ég er bara að láta ykkur vita.“ Tef Poe eyddi síðar tíst­inu og reyndi að sverja það af sér.  

Tístið þar sem Tef Poe hótar aðgerðum.

Fram eftir nóttu leit út fyrir að Clinton færi með sigur af hólmi, þar til það lá fyrir að Trump hafði óvænt sigrað ríki sem tryggðu honum sig­ur­inn, eins og Flórída. Stuðn­ings­menn hans þar voru hæstá­nægðir með nið­ur­stöður kosn­ing­anna.

Í Portland sýndu mót­mæl­endur hins vegar óánægju sína með því að brenna fána lands­ins: