Lilja Alfreðsdóttir utanríkisráðherra sendi í dag samúðarkveðju til Jean-Marc Ayrault, utanríkisráðherra Frakklands, vegna árásarinnar í Nice þar sem minnst 84 létust og yfir 100 slösuðust, þar af 18 lífshættulega. Árásarmaðurinn, Mohamed Lahouaiej Bouhlel, var skotinn til bana af lögreglu, en hann var 31 árs gamall Nice-búi ættaður frá Túnis. 

„Það var skelfilegt að fá fregnir af fjölda óbreyttra borgara sem lét lífið við hátíðarhöld á þjóðhátíðardegi Frakklands í Nice í gær. Þessi hryllilegu voðaverk beindust að frönsku þjóðinni og á sama tíma einnig að þeim gildum sem við öll höldum í heiðri - frelsi, jafnrétti og bræðralagi,“ segir í samúðarkveðjunni frá Lilju. „Ég færi þér og frönsku þjóðinni mínar innilegustu samúðarkveðjur. Við hugsum til og biðjum fyrir þeim sem um sárt eiga að binda.“

Utanríkisráðuneytið sendi út fréttatilkynningu á tólfta tímanum þar sem því er komið á framfæri við Íslendinga í Nice að Rauði krossinn veitir sálrænan stuðning vegna atburðanna. Hjálparsími Rauða krossins er 1717 og svara þjálfaðir og reynslumiklir sjálfboðaliðar símtölum. Ef hringt er erlendis frá er númerið +3545801710.