Kannski hafa ekki margir heyrt talað um bæinn Izra í Sýrlandi sem staðsettur er um 80 km suður af höfuðborginni Damascus. Íbúafjöldinn er svipaður og á Akureyri eða um 20.000 og rétt eins og á Akureyri eru flestir bæjarbúar þar kristinnar trúar. Ólíkt Akureyri kemur Izra töluvert við sögu í Biblíunni. Heimildir eru til um þetta svæði frá því 1334 fyrir Krist auk þess sem heimildir benda til að Izra sé eitt elsta samfélag kristinna manna í heiminum. Þessi landbúnaðarbær, sem segja má að sé af náttúrunnar hendi staðsettur í nokkurs konar virki á milli þriggja fjallgarða, hefur staðið af sér fjöldamörg ríkjasambönd í gegnum aldirnar en þar má helst nefna persneska- og arabíska heimsveldið. Eftir að borgarastyrjöldin í Sýrlandi braust út fyrir fjórum árum hefur þessi gamli bær í fyrsta sinn staðið frammi fyrir þeirri staðreynd að allir kristnir bæjarbúar fari í útlegð fyrir fullt og allt þar sem Jihadistar eða bókstafstrúaðir múslímar ráða nú ríkjum í flestum bæjum í grennd við Izra. Víglínan er nú komin í einungis þriggja kílómetra fjarlægð frá Izra.

Mikilvægt er gera sér grein fyrir því að í gegnum söguna hafa kristnir og múslimar átt afar farsælt samband í Sýrlandi en það stendur einmitt í Kóraninum að Múhameð hafi sagt að bera skuli virðingu fyrir kristnum.

Íslamskir vígamenn studdir af Vesturveldunum

Eins og með flestar borgarastyrjaldir er flókið að reyna að skilja til hlítar upphaf borgarastyrjaldarinnar í Sýrlandi sem og það hrottafengna stríð sem þar hefur átt sér stað undanfarin fjögur ár. En Vesturveldin með Bandaríkin í broddi flykingar hafa verið að þjálfa og vígbúa íslamska vígamenn sem þeir hafa litið á sem hófsama og hafa þeir nú í nokkur ár barist gegn stjórnarher landsins. Þess ber þó að geta að stjórnarher Sýrlands er að langstærstum hluta samansettur af múslimum. 

Forseti Sýrlands, Bashar al-Assad, er alavíti en alavítar eru hluti af einni grein sjía-íslams. Talið er að um 12% Sýrlendinga tilheyri þeirri grein sjía-­íslams. Rétt eins og gyðingar líta alavítar á sig sem hina útvöldu þjóð á meðan bókstafstrúaðir múslimar líta á þá sem trúvillinga. Langstærstur hluti Sýrlendinga eða um 87% eru múslímar og af þeim eru súnnítar fjölmennastir eða um 74% landsmanna en sjítar eru einungis 5% landsmanna. 10% Sýrlendinga eru síðan kristinnar trúar og um 3% drúsar en þeir eiga rætur að rekja til íslams þó langflestir múslimar líti á þá sem trúvillinga. Langstærsti hluti kristinna Sýrlendinga tilheyrir kirkjudeildum Austur-Evrópu en yfir hálf milljón Sýrlendinga eru hluti af grísku rétttrúnaðarkirkjunni. Auk þess er stór hópur kristinna Sýrlendinga hluti af kaþólsku kirkjunni.