Innanríkisráðuneytið neitar að tjá sig um mál fimm ára íslensks drengs sem verður sóttur af lögreglu á heimili fjölskyldu sinnar eftir 37 daga og fluttur nauðugur til Noregs þar sem hann verður vistaður í þrettán ár hjá ókunnugum fósturforeldrum.

Amma drengsins, Helena Brynjólfsdóttir, hefur undanfarna daga reynt að ná í einhvern hjá ráðuneytinu sem hefur með þessi mál að gera en ekki haft erindi sem erfiði. Héraðsdómur Reykjavíkur komst að þeirri niðurstöðu að senda bæri drenginn aftur til Noregs, fyrra dvalarlands, á grundvelli alþjóðasamninga, en Helena flúði með hann frá Noregi vegna ákvörðunar barnaverndarinnar um að senda hann í fóstur hjá norskum fósturforeldrum.

Helena og Eyjólfur Ef barnaverndin í Noregi fær Eyjólf í sína vörslu þá fær Helena ekki að hitta barnabarn sitt fyrr en eftir rúm þrettán ár.

Mynd: Heiða Helgadóttir

Ráðherrar sama ráðuneytis hafa hins vegar í tvígang stigið inn í forsjármál á milli landa. Þannig styrktu bæði Ögmundur Jónasson og Hanna Birna Kristjánsdóttir þriggja barna íslenska móður sem flúði með börn sín til Íslands frá Danmörku, í gegnum Noreg.

Fjármögnuðu flóttaflugvél

Málin eru keimlík en þó ekki – Helena flúði með fimm ára gamalt barnabarn sitt til þess að komast undan norsku barnaverndinni en hin þriggja barna íslenska móðir, Hjördís Svan Aðalheiðardóttir, var að flýja danskan föður barnanna. Þá kom einnig í ljós að hluti styrkjanna frá ráðuneytinu í ráðherratíð Hönnu Birnu var notaður til að fjármagna leigu á flugvél sem flutti mæðgurnar frá Noregi til Íslands. Frá þessu var greint í fjölmörgum fjölmiðlum, meðal annars í ítarlegri úttekt DV.

 „Ráðuneytið tjáir sig ekki um málið.“

Samtals styrkti ráðuneytið Hjördísi Svan um 2,3 milljónir króna en í svari frá innanríkisráðuneytinu á þeim tíma kom fram að fjármunirnir væru ætlaðir greiðslu á ýmiss konar kostnaði – eins og ferðakostnaði, lögfræðikostnaði, þýðingakostnaði og húsnæðiskostnaði. Styrkir í stjórnartíð Ögmundar námu 964 þúsund en námu rúmlega 1.330 þúsund krónum í tíð Hönnu Birnu.

Engin svör, engin aðstoð

Aðstoðin var hins vegar ekki aðeins í formi fjárstyrkja.  Einn af aðstandendum Hjördísar Svan gekk svo langt að segja í viðtali við Fréttablaðið að innanríkisráðuneytið hefði lofað því að Hjördís og stúlkurnar yrðu ekki sendar úr landi ef þær kæmu aftur til Íslands eftir flóttann til landsins. Sú sem sagði þetta er starfandi prestur í Noregi, Arndís Ósk Hauksdóttir. Í dag er hins vegar enga aðstoð að fá. Ekki einu sinni svar við þeirri spurningu hvort innanríkisráðuneytið sé yfirhöfuð að skoða málið.

Í svari innanríkisráðuneytisins við fyrirspurn Stundarinnar er bent á upplýsingatexta um Haag-samninginn sem finna má á vefsíðu innanríkisráðuneytisins. Fyrir utan það var einfaldlega sagt: „Ráðuneytið tjáir sig ekki um málið.“

Elva og Helena Mæðgurnar mættu á samstöðufundinn í gær en 37 dagar eru þar til þau þurfa að afhenda fimm ára gamla drenginn.

Mynd: AMG

37 dagar til stefnu

Stundin hefur fjallað ítarlega um málið frá því Helena steig fram og sagðist hafa rænt barnabarni sínu til þess að bjarga því en hún flúði frá Noregi til Íslands í byrjun júní. Barnaverndin í Kristiansand, þar sem Helena bjó ásamt dætrum sínum, krefst þess að drengnum verði komið upp í flugvél aftur til Noregs svo hægt sé að koma honum fyrir hjá fósturforeldrum. Helena neitaði að afhenda drenginn þegar innanríkisráðuneytið hafði samband við hana þannig að ráðuneytið aðstoðaði norsku barnaverndina að finna lögmann til þess að berjast fyrir afhendingu drengsins fyrir íslenskum dómstólum.

„Ekki láta mín mistök bitna á barninu mínu.
Ég er að standa mig.“

Málinu tapaði Helena og Elva Christina, móðir drengsins, og gaf dómurinn þeim mæðgum sextíu daga til þess að afhenda hann norsku barnaverndinni. Málinu hefur verið áfrýjað en það hefur ekki áhrif á þá sextíu daga sem þeim gefast til þess að kveðja barnið fyrir fullt og allt. 37 dagar eru til stefnu.

Vilja að innanríkisráðherra beiti sér Fjöldi fólks kom saman á samstöðufundinum fyrir framan Alþingishúsið í gær og kröfðust þess að Ólöf Nordal myndi beita sér í máli drengsins.

Mynd: AMG

Sálfræðimati hent út af borðinu í héraði

Í gær var síðan haldinn samstöðufundur á Austurvelli og krafðist þar fjöldi fólks að innanríkisráðherra myndi beita sér í málinu svo hægt væri að finna lausn á því hér á landi en ekki í Noregi. „Ólöf! Ekki leyfa þeim að taka barnið mitt. Ekki láta mín mistök bitna á barninu mínu. Ég er að standa mig. Leyfið honum að alast upp á Íslandi,“ sagði Elva Christina, móðir drengsins, á samstöðufundinum í gær og var greinilega mikið niður fyrir. Þar beindi hún orðum sínum til núverandi innanríkisráðherra, Ólöfu Nordal. Bjarni Benediktsson, formaður Sjálfstæðisflokksins, er starfandi innanríkisráðherra í fjarveru Ólafar Nordal en samkvæmt fréttum er hún í veikindaleyfi.

Þess ber að geta að drengurinn kann enga norsku, talar íslensku, sækir íslenskan leikskóla og á íslenska vini. Þá hefur hann búið hjá ömmu sinni nánast allt sitt líf og mat sálfræðingur, sem gaf skýrslu um málið sem var ekki tekin til greina af Héraðsdómi Reykjavíkur, það sem svo að drengurinn vildi búa hjá fjölskyldu sinni á Íslandi. Þá hefur barnaverndarnefnd Reykjavíkurborgar heimsótt fjölskylduna reglulega auk þess sem móðir hans hefur skilað inn vikulegum prufum til þess að sýna fram á að hún sé ekki í neyslu heldur á batabraut.