Að minnsta kosti 22 eru látnir og 59 særðir eftir að sprengja var sprengd í lok tónleika bandarísku söngkonunnar Ariana Grande að Manchester Arena í gærkvöld. Hér er það sem við vitum:
- Sprengjan sprakk kl. 22.35 að staðartíma, eða 21.35 á íslenskum tíma, þegar tónleikagestir voru að yfirgefa tónleikahöllina.
- Talið er að árásarmaðurinn hafi verið með heimatilbúna sprengju innanklæða og því um sjálfsmorðsárás að ræða. Hann er talinn hafa verið einn að verki.
- Í ávarpi Theresu May, forsætisráðherra Bretlands, núna klukkan tíu að íslenskum tíma, kom fram að yfirvöld telja sig vita hver árásarmaðurinn var en geta ekki gefið út nafn hans að svo stöddu.
- Börn eru á meðal hinna látnu, en söngkonan er afar vinsæl meðal barna og unglinga. Talið er að um 21 þúsund manns hafi verið á tónleikunum í gær.
- Hér er bein útsending Sky fréttastofunnar um árásina:
- Foreldrar og aðrir aðstandendur leitar nú í örvæntingu að fréttum af fjölda ungmenna. Margir hafa gripið til þess ráðs að auglýsa eftir þeim á samfélagsmiðlum.
- Lögreglustjórinn í Manchester, Ian Hopkins, segir að árásin verði rannsökuð sem hryðjuverk, þangað til annað kemur í ljós. Ef um hryðjuverk er að ræða þá er þetta mannskæðasta hryðjuverkaárás frá því í London 2005 þegar 54 létu lífið.
- Nokkrir Íslendingar voru á tónleikunum. Einn þeirra er Ísak Snær Ægisson en hann sagði frá upplifun sinni í viðtali við RÚV í nótt. „Við þurftum að labba upp stiga, og þegar við komum út úr salnum sáum við blóðslettur út um allt gólf og við hlupum eins og fætur toguðu og vorum ótrúlega hrædd. Við vissum ekki hvort önnur sprenging myndi koma og vorum mjög hrædd um líf okkar,“ sagði hann meðal annars.
- Andy Burnham, borgarstjóri í Manchester, sagði á blaðamannafundi í morgun að eftir þessa myrku nótt væru borgarbúar í Manchester að upplifa sína erfiðustu sólarupprás. „Það er erfitt að trúa því sem gerðist hér á síðustu klukkustundum og erfitt að koma orði að áfallinu, reiðinni og sársaukanum sem við upplifum í dag,“ sagði hann meðal annars.
- Theresa May, forsætisráðherra Bretlands, sendi frá sér yfirlýsingu í nótt þar sem hún sendi samúðarkveðjur til fórnarlamba árásarinnar og fjölskyldna þeirra. Þá fordæmdi hún árásina, sem hún kallar „hræðilega hryðjuverkaárás“.
- Hér er fyrsta myndbandið sem sýnir andartakið sem sprengjan sprakk:
- Hér má sjá ringulreiðina sem skapaðist eftir tónleikana:
- Ariana Grande lýsir því á Twitter að hún sé brotin.
Fréttin verður uppfærð.
Athugasemdir